Ki nongtrei bylla sngi ha Secretariat ha ka 28 tarik Rymphang 2024 sngi ki la pynlong ia ka jingshong kyllaiñ mongor ha Madan Malki ban dawa thung kam biang ia ki.
Haba ia kren bad ki nongthoh khubor na ka liang ka Kong Ripyiarsha Kharpran kala iathuh ba ki don kumba 30 ngut tam ki nongtrei kiba trei kum ki Cleaner, ki mali, ki sweeper bad ki Chowkidar. Kine ki nongtrei ki don kiba la trei kumba 10,12 bad ki don kiba dang khyndiat snem ruh.
Ka la iathuh ba naduh u bnai Kyllalyngkot, u Najir u la pynsngew noh da kaba ai daw ba ka tnat finance kam don pisa. Ka la kyrpad ia ka sorkar ba kan thung biang ia ki namar ma ki ruh ki don kam ban bsa ia ka ïing ka sem jong ki, ka wei ruh namar ka snem jong ki ban wat kam biang shawei ruh kam long shuh na kata ka daw kan jynjar ia ki ban leit thep kam biang.
Shuh shuh ki la ong ruh ba une u najir u khlem weng kam ia kito ki ba don jingiadei bad u kane ka pynlyngngoh ia ki namar lada ka tnat Finance kam don pisa kumno kam don pisa tang na ka bynta ki kato katne ngut hynrei ia ki wei pat ka don.