Ha ka jingsdang ia ka Dorbar Mang tyngka kaba dei na ka bynta ka Dorbar Lyiur, ka kynhun Liang pyrshah hapoh ka jingialam jong u Bah Titos Chyne (MDC Sohra) ki la mih Jyndat na ïing Dorbar hynne ka sngi ka 24 tarik Jylliew namar ka jingbym hun ia ka jingbsut ia ka kyntien “Supplementary Expenditure” lane ka jingpynlut ba ka EC kan buh nalor ka bhah ba la dep ban mang.
Haba iatai halor katei ka jingthmu ban wanrah ia katei ka bhah, u Bah Titos Chyne kum u Nongialam ka Liang Pyrshah, u la pan jingpynshai halor kano ka nongrim la thmu ban thep ia katei ka Mang Tyngka. U Bah Titos u la ong ruh ba katkum ka jinglap jong u, ym pat ju don kum kata kyntien ba la ju bsut ha man la ki Mang Tyngka. Shuh shuh u la ong ba lada donkam ban thep, dei ban dawa ynda la dep mynjur ia ka Mang Tyngka (Bugdet). “Kane ka dei ka bym pat ju jia mynno mynno ruh. Ka don kaei kaei sha lyndet jong kane. Phi ju ong ba phin wanrah ia ka jingsynshar kaba khuid, wanrah kein ia ka Budget kaba khuid”.
Nalor kata, u Bah Chyne u la ong ba da lei lei kin ym pdiang ia kane bad dei ban weng shwa ia kane ka kyntien bad pynwai shipor shwa ia ka Dorbar “Lada phim lah ka pyni ia ka jingbym tbit ka jong phi. Kane ka dei ka kam be-ain” ong u Bah Titos.
Ka Kong Grace Kharpuri MDC na Nongshken kaba don ha ka liang pyrshah, ka la pynpaw ia ka pyrshah halor ka jingbsut ia katei ka mat, da kaba ong ba dei ban sangeh shwa, dei ruh ban iaid katkum ki kyndon.
U Bah Titos bad ka Kong Grace ki la ia ban lang ia kajuh ka kyntien kaba ong ba phi lah ban ialam bakla ia u Paidbah hynrei phim lah ban ialam bakla ia ka ïing Dorbar.
U Bah Seiborlang Warbah Dkhot ka EC ba khmih ia ka Tnad Pisa tyngka u la jubab ba ia katei ka mat la ju pyndonkam ruh ha ki snem ba lah dep bad ong ba lada la dep ban buh lypa ia kane Supplementary Expenditure kan pynsuk na ka bynta ban pyniaid ia ki kam kiba hadien.
Wat hadien ba la bteng ia ka Dorbar ha ka kylla kaba ar, kata hadien ba ka liang pyrshah ka la ai jingmut ban weng noh ia katei ka kyntien, ka EC ba thymmai hapoh ka jingialam jong ka VPP, ka la ieng skhem ban buh beit ia katei ka mat ba la dep ban kdew. Kumta da ka jingbitar bad ban pyni ia ka jingbym hun, ki MDC liang pyrshah baroh ki la mih na ka Dorbar khlem ap shuh haduh ban da pyndep ia ka jingwanrah ia ka Mang Tyngka ba pura lyngba u Shongknor, Bah Strongpillar Kharjana.
Ia kane ka Dorbar Lyiur yn pynkut ha ka 30 jylliew 2025.
