Ka long shisha kaei kaei kaba sngewlyngngoh ba ka pisa nar T.10 tyngka kam ïaid ïew ha East Jaiñtia Hills District, namar ki nongdie dukan la ki dei ki dukan heh ne ki dukan rit ruh kim ju treh ban shim ïa ka pisa T.10 tyngka kaba da ka nar, halor kane, u samla Arkijuh Dkhar, uba na ka shnong Khliehriat, mynta ka sngi u la buh da ka jingthoh hakhmat u Deputy Commissioner bad ong ba ki paidbah hapoh ka Disrict kim da mon than ban shim ïa ka pisa T.10 tyngka nar ba la pynmih da ka Reserve Bank of India.
Kat ka jingthoh u samla Arkijuh u la pynpaw ba watla kane ka pisa kam dei kaba beaiñ, hynrei ka wanrah jingeh bha ïa ki paidbah kiba bat ïa ka pisa 10 tyngka nar namar ba ki nong die dukan kim treh ban shim ïa ka pisa, ha kajuh ka por, u la ong ba kane ka wanrah ïa ka jingsngew lyngngoh ïa kiba bun khamtam kito ki briew kiba wan na bar ka District bad na bar ka Jylla bad ka long ruh kaba sngew jah burom ha khmat kito kiba wan na shabar.
U samla Arkijuh, u kyntu ïa u Deputy Commissioner ka East Jaiñtia Hills District ba u dei ban leh eiei halor kane ka jingleh jong ki nong die dukan bad ki paidbah hapoh ka District ba ki dei ban tip bad ban sngewthuh ba ka 10 tyngka nar (coin) ka dei ka pisa kaba lah ban pynïaid ïew bad ba ki dei ban pdiang lada ki nong wan thied jingthied ki ai, u la kyntu ruh ïa ki bor District ba ki dei ban pynmih da ka hukum (order) bad ban pynshai sha ki paidbah bad ruh ban pynshitom ïa kito ki bym treh ban shim ïa ka 10 tyngka nar (coin).
Utei u samla, u kyrmen ba da ka jingshim khia ka ophis u Deputy Commissioner yn sa lah ban pynïaid ïew ïa ka pisa T.10 tyngka nar hapoh ka District.
Kum kane ka jingeh ka jia ruh ha ki katto katne ki bynta jong ka West Jaiñtia Hills District ruh, ha kaba don ki dukan kiba thlia ban shim ia ki pisa nar la ki dei ki 5 tyngka ne ki 10 tyngka ruh. Kumta ki bor pynïaid District bad ki Bank ruh kila dei ban leh ei ei halor kane ka jingeh ba ki paidbah ki ia kynduh.