Haka jingiadei bad ka jingleh mynthi ka ophis jong u Divisional Forest (T) halor ka RTI bala wad da u wei u samla u Wallambok haba iadei bad kiba khlong Maw (Builder Stone), khlong shyiap na ki wah kum haka wah Myntang naduh Mulum, shaduh ki bynta jong ka Psiar, Khatkasla, Nartiang, Nongjngi ter ter shaduh bakut jong ka wah kumjuh ruh haka wah Mynriang, ia kaba la wad jingtip naduh 20 Iaiong 2023 haduh mynta ympat ioh iaka jubab. Kane ka rukom leh ka ophis kumne u samla Wallambok u la ong ba ka pynpyrkhat sniew ia u kum u nongwad RTI namar la bun sien bala wan kylli bad kren lyngba ka phone ki kren kyllaiñ ia u. Ha ka 25 tatik u bnai Jymmang ki ai tang ia ka kopi ban siew bai xerox ula ong u kloi ban siew ia kata ka bai xerox long katba long hynrei hadien ar taiew u kylli biang lyngba ka phone ha iwei i nongtrei hynrei ki aidaw bymdon sahep kumta ula rai mynta ban leit ujor noh sha u Chief Information Commission (CIC) la da ha kane ruh kam seisoh um banse ban iaid noh sha ka Meghalaya High Court ba don burom.
Na ka por shaka por ula ong ba u juh thoh complain ne ujor sha kane ka ophis kum juh sha u Principal Conservator of Forest Shillong ban khang ne leh eiei naduh kine ki kharkhana otdieng (Sawmill) haduh kine ki jaka tihmaw tih shyiap beaiñ hynrei kam poi shano shano ruh mynta daka wei ka jingmut u la rai ban phah jingthoh sha Ministry of Environment and Climate Change, ym dei tang ban khang ia ki namar ba kane ka dei ka kam pynjot mei mariang kumjuh dei ban leh eiei ruh ia kine ki ophisar kiba shuh bam tang ka tulop katba ia ka kam ban leh hok ne trei hok ka paw tyngkrein ki khlem lej eiei namar ia kine ki aiñ la shna da ka sorkar ban iada ia ki dieng, ki siej, ki um ki wah, ki Mrad um bad ki sim ki doh.
Kaba sngew phylla shuh shuh ka long ba wat ki nongtrei kane ka ophis ki khaïi kum u shyiap sha Factory Cement, ha kano ka rukom ki ioh challance da ki nongtrei sorkar bad ruh ki don mining ne em? Buh jingkylli u bah Wallambok ia ka ophis ia kine la iathuh da uwei u nongkhaii shyiap u bym don mining.
“Ia ngi kiba rit ba ria lada ngi kit dieng, kitmaw ne kit shyiap tang shi pickup ban pyndonkam shimet ha ïing lajan man la ki check point jong ka tnad khlaw naduh District haduh jong ka State ngi juh shah pyndik ne siew kador barem katba ia kine kiba paw pyllien pyllien ym don ba wan leh kat kum ki kyndon jong ka Water Act, United Khasi Jaintia Fishery Act 1954 section 4&5 bad ruh jong ka Indian Fishery Act 1897.” la pynkut u samla Wallambok.