Ka Association jong ki VEC kaba hap hapoh ka Lumshnong C&RD Block kaba dang hap hapoh ka jingpeit jong ka Wapung C&RD Block ka la pynpaw ba kala shah leh bym kheiñ snep ha u BDO Dr. T.Shylla, ha kaba une u BDO jong ka Wapung C&RD Block um shah ia ki VEC kiba don hapoh ka Lumshnong C&RD Block ban enter ia ki materials bill jong ki, kiba ki VEC ki la dep pyntrei hashwa ka Financial year 2023-2024, bad wat hadien kane ka Financial ruh um shah ban enter ia ki materials bill jong ki VEC na ki shnong ba pher ba pher kiba don hapoh ka Lumshnong C & RD Block hadien ba ki la dep ban pyntrei ia ki jingtrei MGNREGA.
Na ka liang ki VEC kila leit ban submit ia ki Utilization Certificate (UC) sha Wapung C & RD Block, hynrei u tei u BDO um shah ia ki Staff jong u ban enter ia kine ki Materials bill jong ka Lumshnong C & RD Block, haba ki VEC jong ka Lumshnong C&RD Block ki la kylli na utei u BDO, balei ba um shah ban enter ia ki Materials bill jong ki. U la jubab ba dei na ka State bym shah ban enter ia ki materials bill jong ki.
Hadien ka jingiaishah da ki snem, ki nongkitkam jong ka VEC Lumshnong C&RD Block Association ha ka 27 tarik u bnai August, 2024 kane ka kynhun ka la leit ban ia kynduh ia i Joint Mission Director State Rural Employment Society (SRES) Govt of Meghalaya, da ka jingmut ban ioh jingpynshai na kane ka Office na kaei ka daw ba kim shah ban enter ia ki material bills jong ki VEC kiba don hapoh ka Lumshnong C&RD, hynrei kaba pynlyngngoh ia ka Association ban tip na i kong I. Diengdoh kaba dei i Joint Mission Director ka la ong ba kam juh don kum kata ka aiñ, i la pynshai shuh shuh ba ka Lumshnong C&RD Block ym shym la pynkynriah na ka Wapung C&RD Block.
Kumta baroh ki kam ka dang dei ka kamram jong u tei u BDO ban peit ka juh ka jingtrei kam ia baroh ar tylli ki Block, ym da kaba leh shilliang kumtei. Ka la iathuh ruh ba la dep ban pyllait ia ka bai materials jong baroh ar tylli kine Block kaba duna 15 klur tyngka ha kane ka Financial year 2023-2024, la iathuh ruh ba ia ka Lumshnong C&RD Block la mang kyrpang namar ba dang dei ka Block ba thymmai. Na bynta kane, ki vec baroh kiba don hapoh ka C&RD Block Lumshnong ki pynpaw ka jingsngewnguh ia ka sorkar jylla namar ba ka la pyllait ia katei ka pisa, pynban dei tang ka jingleh marwei utei u BDO. Hynrei ym tip na ka daw aiu ba u tei u BDO u khlem shah wat tang ban enter ia ki materials bill jong ki VEC kiba don hapoh Lumshnong C & RD Block, kane ka jingleh u tei u BDO ka la khanglad ia ki VEC ban trei MGNREGA wat la dei tang kane hi ka scheme kaba ai jingmyntoi sha ki thaiñ nongkyndong.
Na ka daw ka jingshah leh shilliang ha u tei u BDO, ki VEC ki la rai ban sangeh trei MGNREGA ha une u snem 2024, ka Association ka la iathuh shuh shuh ba une u BDO ym juh khot meeting ia ki VEC kiba don ha ka Lumshnong C&RD Block haduh kine ki sngi.