Ka Khasi Jaintia Raw Materials Supplier Association mynta ka sngi ka 1 tarik Naitung ki la wan iakynduh ia u Deputy Chief Minister Bah Prestone Tynsong haba iadei bad ka jingeh ba ki iakynduh halor ka jingbym shah iaid truck na Mawmaram ban mih sha Lad Umsaw Damsait.
Haba kren sha ki lad pathai khubor na ka liang u Bah Paul Kharbani Secretary kane ka kynhun u la ong nyngkong ngi pynpaw ia ka jingsngewnguh ia u Deputy Chief Minister u bah Prestone Tynsong uba la kloi ban shimkhia haba iadei bad ka jingeh halor ka jingbym shah iaid ia ki truck kit jingkit na thaiñ Mawmawram ban mih sha Lad Umsaw.
Shuh shuh u la iathuh kumba 2 bnai tam ei ei ka sorkar ka khlem shah ban iaid ia ki truck kit jingkit na Mawmaram sha lad Umsaw Damsait bad ki hap iaid lyngba ka Bye Pass Mawrynkneng, ka daw ka dei ba synjor palat ka jingkieng ha Mawlyndep ka surok ban mih sha Lad Umsaw, bad kane ka la buh jingeh ia ki kum ka kynhun namar ka jinglut ka la long arshah bad ka kynhun hadien ba ka la wan pynsngew sha u Symbud Myntri Rangbah mar mar u la pyntip ba ha kine ki sngi ban wan la shah ban iaid ia ki truck tang kiba 6 taiar namar ka jingsynjor jong ka jingkieng ha Mawlyndep ka surok ban mih sha Lad Umsaw Ri Bhoi District.
Ka kynhun ka ai khublei ia ka sorkar khamtam ia u Symbud Myntri Rangbah ba la kloi ban shimkhia ia ki jingeh jong ka kynhun bad kumjuh ia ki nongniah truck kiba ju kit jingkit ban iaid lyngba ka surok na West Khasi Hills sha Mawmaram Lad Umsaw Ri Bhoi District.
