Ka Hynñiewtrep Youth Council (HYC) ha ka 24 tarik Lber 2025 ka la leit iakynduh ia u Deputy Director halor ka jingkynrum kynram ba mih na ka rukom thung kam Nurse ha NEIGRIHMS.
Haba kren sha ki lad pathai khubor na ka liang u Bah Roy Kupar Synrem, President Hynniewtrep Youth Council u la ong ka jingwan kynduh ia u Deputy Director ka NEIGRIHMS ka dei halor ka jingioh kam ki nurse shynrang na kiwei ki Jylla. U la ong ka jingdon ki nurse shynrang ka wanrah ia ka jingbym shngaiñ ia ki nongwan shah sumar bad ki nongpang ha kane ka hospital bad kumjuh ia ki nongtrei ha kane ka hospital namar ka la don ka jingshah kynnoh jrong kti da ki nurse shynrang ha kane ka hospital. U la ong ka jingwanrah ia ki nurse shynrang ha kane ka hospital kim shim la khang ka wanrah ia ka jingtieng namar ba na ki 600 tylli ki kam nurse 300 ngut ki dei ki Nurse Shynrang.
U la bynrap lada kane ka jingthung kam nurse khlem da pynshai ba kan don 80 percent ia ki nurse shynrang bad 20 percent ia ki nurse kynthei lada kam don ka jingkren shai kan poi ka por ba ha NEIGRIHMS kin sa dap da ki nurse shynrang.
Shuh shuh u la bynrap “ka NEIGRIHMS kaba dei ka jaka sumar ha Jylla kiba shah sumar kin dei ki hymmen ki para jong ngi hato yn sngewtynnad ha ki jaka labour room ba ioh khyllung yn sumar da ki nurse shynrang bad ha jaka ba pang ki khun kynthei yn sumar da ki nurse shynrang, ki ba ngim tip kaei kin leh?”.
Ka Seng HYC ka pynpaw ia ka jingpyrshah bad dawa na ki bor pyniaid jong ka NEIGRIHMS ba kin pynbna ba na ka 170 tylli ki kam nurse ba lait katno ngut kin dei ki shynrang bad katno ngut kin dei ki kynthei bad ha kiwei ki Jylla ki leh ia ka Recruitment da kaba ki pynbiang 80 percent ia ki kynthei bad 20 percent ia ki Shynrang namar ka Seng ka tieng kum ha ki por ba la dep ka NEIGRIHMS ka thung da ki briew na kiwei ki Jylla bad ka Seng kam kwah ba kan jia biang kumjuh bad dawa na ka NEIGRIHMS ba dei ban wanrah beit da ka Recruitment 80-20 Ratio ha kane ka kam Nurse.
