[Ujor u Nongsaitaiñ sha u DC ka EJH District]
Ka jingsniew jong u surok (Internal Road) ba pyniasoh ia ka shnong Khliehriat East shaduh ka shnong Rymbai kala nangjur nangjur katba nang mih ki sngi. Kane ka jingsniew jong u surok kala wanrah jingeh haduh katta katta ia ki nongleit nongwan lyngba une u surok. Wat la une u surok u long uba donkam haduh katta katta uba iarap ban pyniasoh ia kitei ki ar tylli ki shnong, nalor ba ka iarap shibun haba don ka jingsahkut kali ha ki bynta jong ka shnong Kliehriat ha u NH-6.
Haduh mynta na ka liang jong ka tnat PWD ka la iai ieh khunswet ia une u surok, khlem kano kano ka jingmaramot, bad mynta katba nangmih ki sngi une u surok ula dap sa tang ki thliew ki syar suda.
Ha kaba iadei bad kane dang shen ha u bnai Nohprah 2021 u wei na ki nongshong shnong jong ka thaiñ uba dei ruh u Nongsaitaiñ ma Kerlang Ksoo na ka shnong Dkhiah West, ula dep ban ai ka jingujor sha u Executive Engineer ka PWD (Roads), East Jaintia Hills District, ban kyntu ia katei ka tnat ban pynbha ia une u surok, hynrei haduh mynta na ka liang ka PWD kam pat shym la leh ei ei ruh em.
Kumta u ma Ksoo ha ka 1/2/2022 ula phah noh da ka jingthoh sha u Deputy Commissioner jong ka East Jaintia Hills District ban kyrpad ia u ban tuklar lem halor kane ka jingsniew palat jong utei u surok naduh Khliehriat East haduh Rymbai.
Ha ka shithi ujor u ma Ksoo ula pyni ba une u surok u dei uwei na ki surok ba donkam haduh katta katta namar ba u pyniasoh ia kiba bun ki ophis sorkar, kum ka ophis District AH&Vety, ka Court jong ka District Session Judge, ka ophis Legal Metrology, ka District Tourism & Informatics Center, ka ophis District Fishery bad ka ophis DIPR. Nalor ki ophis sorkar ki don ruh sa ki jaka sah (Quarters) jong u Deputy Commissioner, ADC’s, EAC’s bad ruh jong ki nongtrei ka ophis jong u DC East Jaintia Hills.
U ma Ksoo ula iathuh ba kane ka jingsniew jong u surok ym dei tang ba ka wanrah ka jingeh ia ki nongleit nongwan, ha baroh shilynter u surok, hynrei ka wanrah jingeh ruh ia ki kali motor ruh ban iaid lyngba une u surok. Kaba kham shyrkhei ka long ba tang na ka daw jong ka jingsniew palat u surok ka lah ban wanrah ruh ka jingjia ba sngewsih kum ka jingiatakhuh kali bad ka jingma ia ki khynnah skul ne ki paidbah kiba iaid ba ieng ha shilynter jong une u surok.
Kumta u ma Kerlang ula kyntu ia u Deputy Commissioner ka East Jaintia Hills ba un sngewbha ban shim khia bad tuklar lem kloi katba lah halor kane ka jingsniew u surok ban ioh pynbha noh ia utei u surok khnang ban pynioh ia ki paidbah nongshong shnong ka thaiñ iala ka jong ka hok kynti jong ki katkum ka Riti synshar jong ka ri India.
