Ka Environment Coordination Committee (ECC) kaba khmih thuh halor ka jingpyntrei ia ki Coke Plant hapoh East Jaintia Hills District kala pynpaw ka jingbynñiaw kaba khraw halor ka jingphai shkor kyllut ka sokar jylla ia ki nongshong shnong jong ka Elaka Sutnga halor ka jingai License sha ki karkhana thang dewiong ne kita ki Coke Plant kiba don hapoh jong kane ka thaiñ.
Katkum ka khubor kaba la pyllait da u President jong ka ECC u ma Never Lamurong ula ong ba dang shen ka Committee hadien ka jingioh jingujor na ki paidbah, ka la leit ban jurip bad lap shisha ia kawei ka Coke Plant kaba la ai kyrteng ka M/s Barbarik Coke kaba dang maramot shait shait ia ka karkhana jong ka na ka bynta ban pyntrei ia kane ka kam thang dewiong.
Ka Committee kala pynpaw ba ki don haduh 31 tylli ki coke plant hapoh ka East Jaintia Hills District kila thmu ban pyntrei beaiñ hapoh ka District ha kaba na ka liang jong ka Meghalaya State Pollution Board (MSPCB) ha ka 06.01.2022 kala pynkut ruh ia ka application jong ki, nalor ba ki hap ban siew ia ka kuna kaba heh sha ka National Green Tribunal (NGT), Kolkata.
Hynrei kaba pynlyngngoh ia ka ECC ban tip ka long ba katkum ka RTI ba ka Committee kala ioh ka long ba ka MSPCB kala ai Clearance (CTEs) biang sha ki 16 tylli ki Coke plan. Kiba kynthup ia ka M/s North East Coke industries, M/s Magic Coke second Chimney, M/s MM Minerals, M/s Unique Coke industry second chimney, M/s Presidium Breez, M/s Ioanis Industries Pvt Second Chimney, M/s Mega Coke Second Chimney, M/s Umthe Carbon, M/s Jaintia Coke industries Second Chimney, M/s SD Coke industries, M/s Vaishnu Private Ltd, M/s Malang Coke Industries, M/s Barbarik Coke Industries, M/s Royalborn Associate Coke, M/s Westland Coke bad ka M/s SS Coke.
Na ka liang jong ka Committee ka buh ka jingkyntu jur ia u Chief Minister ban ai ka jubab halor kane, namar dei ma u, u ba dei peit ia kane ka tnad.
Na ka liang jong ka ECC kan sa wad da kiwei pat ki lad ki lynti jingiakhih halor kane ka jingshah jong ka sorkar ia kitei ki coke plan ban treikam biang hapoh ka District. La kyntu ruh ia ka sorkar ban pynduh noh shisyndon ia ki license ba la ai sha kitei ki karkhana bad ruh ban pynshitom ia ka MSPCB kaba don bynta halor kane ka kam.
Ka ECC ka pynpaw ba lada kine ki karkhana kin ioh lad ban pyntrei ia ka kam jong ki khlem pep ka East Jaintia Hills khamtam ka thaiñ jong ka Elaka Sutnga kan sa kylla Byrnihat hapoh ki khyndiat snem ban wan la pynpaw ka Committee.
