[Photo : MSL]
Ka kynhun ïalehkai jong ka Rangdajied United FC kala pynliem da 6-0 kol ïa ka Seinpynbhalang Laskein SC ha ka jingialehkai kaba la pynlong mynta ka sngi (18.05.2023) ha ka jingïakhun jong ka lympung ïalehkai phutbol ka Meghalaya State League (MSL) 2023 (Jowai Zone-B) ha madan Kiang Nangbah Stadium Jowai.
Haba phai sha ka jingïakhun kala long kaba noh shiliang bha hapdeng kine ki ar kynhun wat la ka Seinpynbhalang Laskein SC ka la pynrshang ban ïakhun dohïap katba lah ban thep ïa ki kol hynrei ka long leh noh ei, kaba la pynlong ia ki nongwan peit kai mynta ka sngi ban ym sngewtynnad satia ia kane ka jingiakhun.
Na ka liang ka Rangdajied United FC kala ïoh ban thep ar kol lyngba u Bansanbha Khongsdam ha ka minit jong ka 19 bad 74, sa ar kol biang lyngba u Tremiki Lamurong ha ka minit ba 75 bad 76. Katba ia kiwei pat ki ar kol la ioh ban thep mar shi kol da u Basuklang Bina ha ka minit ba 63 bad u Wanlamsuk Nongkhlaw ha ka minit kaba 90+2 jong ka jingialehkai.
Ka jingïakhun lashai ka sngi (19.05.2023) pat kan long hapdeng ka niaw Wasa United pyrshah ïa ka Moolait United FC, ha ka por 2: 30 baje nohphai sngi.