Kum shibynta ban kynmaw burom ia ka lyngkhuh sngi iap ba 4 snem jong i mei-ieid Spility Lyngdoh Langrin, ka Khasi Student Union (KSU) ha ka 28 Tarik Risaw 2024, kala teh Banner ha kylleng ka Nongbah Shillong. Ka KSU ka pynbna ruh ba ia ka 28 tarik Risaw la ju tip ruh kum ka sngi pyrshah Uranium lane ka ‘Anti-Uranium Day’ hapoh ka Jylla Meghalaya .
I Mei-ieid Spility Lyngdoh Langrin (ban kwai ha dwar u Balei), 95 snem ka rta, i dei na ka shnong Domiasiat, South West Khasi Hills District, bad la ju tip ruh ia i kum “Mother of all who stood against Uranium Mining”.
Kum ban shu pynkynmaw, i Mei-ieid Spility Lyngdoh Langrin i la kyntait ia ka jingtyrwa Pisa jong ka Sorkar kaba long T. 45 klur na ka bynta ban aiwai ia ka jaka jong i sha ka UCIL, kaba don ha Domiasiat ha u snem 1990.
Na ka liang ka Youths Forum for Protection of Human Rights (YFPHR) lyngba ka kyrwoh na u S. Ngouba Meitei, u Media Coordinator u la kyrpad ïa ki paidbah jong ka thaiñ Shatei Lammihngi ban iasnoh kti lang ban ialeh pyrshah ia kino kino ki kam tih marpoh khyndew kaba wan kum ka jingshim kabu ha ka kyrteng jong ka roi ka par kaba pynkheiñ ia ka hok jong ki trai ri trai muluk ha ka jingrakhe lyngkhuh sngi iap ba 4 jong i Meiieid Spility Lyngdoh Langrin i ba ieng pyrshah ia ka jingthmu tih uranium ha South West Khasi Hills, Meghalaya.
Ka jingshlur bad ka mon kaba ka la don ha ka por ba i dang im ka la pynkyndit bynriew ia ki paidbah ka Meghalaya bad ia ka Thaiñ Shatei Lam Mihngi. I la iakhun pyrshah ia ka Uranium Corporation of India (UCIL) kaba la tyrwa ban 1.3 klur man la u snem ban ai wai ia ka jaka jong i ha Domiasiat South West Khasi Hills ban tih ia u Uranium.
Ha ka jingdap 4 snem ka jingkhlad noh i Meiieid , ka la dei ka por ba ki paidbah ka Manipur kin shim jinghikai na ka jingkhih jong ka pyrshah ia ka jingtih mawshun bad buh jingkylli ia ka agenda jong ki karkhana tih marpoh khyndew, kiba thmu mynta ban sdang ia ki rukom tih marpoh khyndew bapher bapher ha Manipur bad ruh ia ka jingtih Umphniang kaba dang iaid shakhmat ha Tamenglong District bad kiwei ki bynta jong ka Manipur. “Ngi kyrpad ia ki agency bad ki company ba kin sangeh noh ia kino kino ki rukom tih marpoh khyndew ha ka jylla Manipur bad Ka thaiñ Shatei Lammihngi baroh kawei bad sangeh noh ia ka jingpynjot ia ki jaka jong ki paidriewlum .Ngi pynpaw ruh ia ka jingiatylli jong ngi ha kaba rakhe ia ka Anti Uranium Day kaba dang rakhe da ki Khasi Students’ Union (KSU) ha ka Jylla Meghalaya , kum ka jingkynmaw burom ïa i Meiieid Spility Lyngdoh Langrin” ong ka kyrwoh lyngba u Bah Donald V.Thabah, General Secretary KSU.