Shi bynta ban rakhe ia ka International Women’s Day, ka ophis jong ka District Hub for Empowerment of Women, ka tnad Social Welfare, West Jaintia Hills District ha ryngkat ka jingiatreilang bad ka tnad Pulit jong ka nongbah Jowai, ki la pynlong ia ka jingiaid bike rally kaba pynsawa ia ka jingpynkupbor, ka jingiatylli, ka jingkhlaiñ bad ka jingkiew shaphrang jong ki kynthei mynta ka sngi 8/3/2025.
Ia kane ka bike rally la kaweh lama da ka kong C. Lyngdoh, MPS kaba dei ka Additional Superintendent of Police, Jowai na phyllaw jong ka District Library, Mynthong, Jowai bad leit pynkut ha Madan Wahriong, Mihmyntdu. Ha kane ka rally kila don haduh 70 ngut ki nongñiah bike kynthei bad shynrang ki la ïaid lang lyngba ka sor Jowai da kaba pynsawa ïa ki sur jingrwai Khasi “Kynthei Tur Shaphrang”.
Haba ai jingkren ka kong Lyngdoh ka la pynpaw ba ka sngi jong ki kynthei ha ka pyrthei ka dei ka por ban rakhe ïa ka jingkhlain, ka jinglah ban ïakhun bad ki jingjop jong ki kynthei ha kylleng ka pyrthei. Ka la ong ba ka long kaba kongsan ban ithuh ia ki jingialeh jong ki kynthei ha ki bynta bapher bapher jong ka jingim.
Haba kren halor ka jingpynkupbor ïa ki kynthei, ka la ban jur ba ka hok jong ki kynthei ka dei ka hok longbriew manbriew, namar ki kynthei ki don ka bynta kaba kongsan ym tang hapoh ka longïing longsem kum ki kmie, ki tnga, ki khun kynthei hynrei kum u budlum jong ka jingkiew ha ka imlang sahlang.
Ka la kdew ba ka jingdon bun ki kynthei kiba iashim bynta ha kane ka rally ka jingpynshisha ïa ka jingkiew jong ki kynthei ha kiba bun ki liang. Ka la pynshlur ia baroh ban bteng ban pynkupbor ia ki kynthei, ban kyrshan ia ki ban kiew, ban ialam bad ban pynpawnam ia ki ha man ki bynta bapher bapher.
Kiwei de kiba la ai jingkren ha kane ka sngi ki kynthup ia ka kong S. Lakiang, BBBP Ambassador, District Hub, u ma S. Manar, O.C Police Station Jowai, i kong R. Ryngkhlem, President Iasnohktilang V.O Mihmyntdu. Ha ka jingkren jong ki, kila ban jur halor ka jingdonkam ban pynkupbor, ban aimynsiem ia ki kynthei ban pynduh ia ki jingkhanglad bad ban ialeh ban pynkiew shaphrang ia ki kynthei ha man la ki bynta.
I kong I. Kharpran O.C Women Police Station Jowai, i kong L. Ksoo Centre Manager cum Protection Officer ka One Stop Centre, u F. Rynnga, District Mission Coordinator, District Hub, i kong Y. Najiar, District Social Welfare, Jowai bad i kong Yoohi Kyndait, Gender Specialist, ka District Hub for empowerment of Women, Jowai, ki la ïashim bynta lang ha kane ka rally.
