Mynta ka sngi ki dkhot jong ka seng Hynniewtrep Youth Council (HYC) ha kylleng ki bynta jong ka Jylla da ka jingiasnohkti lang bad ka HYC Central body kynthup kiba ha ka nongbah Shillong, Mawkyrwat bad na Jaintia Hills District Unit, kila pynlong Black Flag ne ka jingmih paidbah ryngkat ka jingrah ia ki banner bad ka jingteh lama iong ia ki kali bad sam ruh ia ki pamphlet sha ki paidbah kum ka dak ban pynpaw ia ka jingpyrshah halor ka jingkiew shaba palat dor ka umphiang Petrol, ka Diesel bad wat ka LPG ruh ha kane ka jylla bad ha ka ri hi baroh kawei.
Ha nongbah Jowai la pynlong ia ka prokram ha Lad Kiang Nangbah Governrment College Jowai, ha nongbah Shillong la pynlong ha Motphran bad ha Mawkyrwat pat la pynlong ha ki bynta iew Mawkyrwat.
Ka HYC kala dawa jur na ka sorkar Jylla ba ka dei ban thaw ki lad ki lynti ban pynhiar ia ka dor jong ka Umphniang Petrol bad Diesel. Ka seng kam sngewiahap ruh ia ka jingpynlut phut jong ka sorkar MDA ha kaba thung kam ia ki briew kiba la shongthait na ka kam ha ki kyrdan kiba heh ba heh kaba ktah ia ka pisa jong ki paidbah. Ka seng kala kynthoh jur ruh halor ka jingoh khajna kaba heh da ka sorkar halor ka Umphniang, kaba pynlong ia ka daw ban kiew shuh shuh ka don umphniang. Kumta ka seng da kawei ka sur kala dawa ba dei ban pynduna haduh 50 % ia ka dor jong ka Umphniang Petrol bad Diesel ha kine ki khyndiat sngi ban wan.
