Ka Hynniewtrep Integrated Territorial Organisation (HITO), mynta ka sngi ka 15 tarik July 2025 hapoh ka jingialam u General Secretary sengkmie u bah Wanbun N Dkhar, lem bad u President ka East Jaiñtia Hills District u bah Deibormi Rymbai bad u Co-Founder u bah Lawyerson War ki la leit ban ujor syndon daka FIR ha Khliehriat PS, pyrshah ia u ma Sevenborn Tang uba kam ialade ba u dei u Lessee lane u Agent jong ka Jaiñtia Hills Autonomous District Council, Forest Department ban pyniaid ia ki Forest Check Point lane Forest Revenue Station.
Ka seng lyngba ki jubab ba ka la ioh na ka Right to Information (RTI) Act 2005 na ka office jong u Chief Forest Officer (CFO) JHADC ka la jubab shai ba ka JHADC kam shem la thung ne buh ia kino kino ki Agent ban pyniaid ia ki Check Point jong ka, hynrei ia kane la leh daka jingiasuh buit jong ki katto katne ki MDC ka liang synshar ban ioh myntoi ialade hynrei ym ia ka Council baroh kawei.
Shuh shuh na ka liang jong u Wanbun N Dkhar u la ong ba kane ka jingbuddien jong ka seng ka long hadien bala iohi iaka jingkyrduh bad jinghiran pisa ka Council wat tang ban siew tulop ia ki nongtrei ruh ka shem jingeh, hynrei kane ka jinglum pisa be-aiñ ha ki khyrdop ka JHADC ka dei tang ban pynmyntoi ia ki katto katne ki MDC bad kane ka buh jingma ia ka lawei jong ka Council.
Ha kaba iadei bad kane ka jingujor ejahar pyrshah ia u Sevenborn Tang ka seng kala dawa ba u la dei ban pynphai noh ia ka pisa kaba u la ioh lum lyngba kitei ki khyrdop naduh u Nohprah 2024 haduh u Jylliew 2025 la pynkut ka kyrwoh.
