Ka Seiñ Kur Dkhar East Jaintia Hills District (SKDEJHD), ha u kyrwoh ba la phah da ki nongialam jong ka, u President, Teras Dkhar, bad u Adh. General Secretary, u M H Dkhar, ka la pyntip paidbah, ba ha kine ki bnai ban wan, kan sa Pynkup Burom bad ai Excellence Award ia ki khynnah pule jong ka Seiñ Kur Dkhar East Jaintia Hills District, kiba la pass ha ka kyrdan “Top 20” ha ki eksamin Class-X bad Class-XII jong ki, lane ia kino kino ki eksamin jong ki kyrdan jingpule jong ki, kiba ia ryngkat kyrdan bad ka Class-X bad Class-XII, kiba dei ki jait eksamin kiba la ithuh da kano kano sorkar jylla lane ka sorkar India.
Shuh shuh, ha ka jingiadei bad katei Jingpynkup Burom bad ka jingai Excellence Award, ka Seiñ Kur Dkhar East Jaintia Hills District, kan Pynkup Burom bad ai Excellence Award lang ruh, ia kino kino ruh ki khun samla jong ka Seiñ Kur Dkhar East Jaintia Hills District, kiba la wanrah ia ka Nam bad Burom ia ka Kur Dkhar ha East Jaintia Hills District, da kaba ki la jop ia kino kino ki kynja jingiakhun (Competitions) kum ha ki kam jingialehkai (Sports & Games) bad kiwei kiwei de ki kynja jingjop (Winnings) ia kiba la pynleh ha ha kyrdan jong ka state level shaneng da ki bor ba la ithuh da ka sorkar.
Ia katei ka jingpynkup burom bad jingai Excellence Award, yn leh tang ia kito ki ba la pass bad ki ba la jop ha kitei ki kyrdan ba la kdew haneng ha u snem 2022 bad haduh 2023, bad ruh ba ia kane yn leh tang ia ki khynnah pule bad ki khun samla jong ka Seiñ Kur Dkhar East Jaintia Hills District, kiba dei ki nongshongshnong ba pura jong ka East Jaintia Hills District hi.
Kumta, ha ka jingiadei bad kane, namar ka jingbun palat jong ki Kur Dkhar ha East Jaintia Hills District, ka seng ka kyrpad ia ki samla pule bad ia ki khun samla jong ka Kur Dkhar East Jaintia Hills District, ba lada don kino kino kiba la poi shatei ka thong jong kitei ki jait jingjop (Winnings) baroh ar ba la kdew haneng, kin sngewbha ban phah ia ki kot ki sla ba donkam jong ki, kiba la dep pynshisha (Attested), kum ki Marksheet (na bynta ki khynnah skul), ki Certificate, ki Residential Certificate, lem bad kino kino ki kynja jingthoh lane jingpynbna ba la pynbna da ki bor ba dei peit ia kiba kum kita ki jait jingjop (Winnings), kum ka pynshisha halor kiba kum kita ki jait jingpass lane jingjop jong ki.
Ia kitei ki kot ki sla ba la kdew haneng, lah ban pynpoi ha ki kti jong kitei ki nongialam jong ka Seiñ Kur Dkhar East Jaintia Hills District, ba la kdew kyrteng haneng, lane da kaba scan shai bha bad sa phah ia ki lyngba ka Email, “skd.ejhd@gmail.com,” lane ha ki WhatsApp Nos., 9615400135/7005208334, hapoh jong ka 14 tarik jong u bnai Nailar (August), 2023.
Na ka bynta ki jingtip ba kham bniah halor katei ka phang ba la kdew haneng, phi lah ban phone ha kine ki Mobile Number: 9615400135 / 7005208334 naduh kapor 10:00 AM haduh 10:00 PM.