Ki nongpyniaid jong ka skul Mukhla Wahshnong SSA LP School, lyngba ka School Managing Committee (SMC) kila pynlong ia ka Fete ha kane ka sngi Saitjain kaba dei shi bynta ban pynmih pisa ban ioh siew ia ka tulop nonghikai ha katei ka skul.
Ia ka skul Mukhla Wahshnong LP la seng naduh u snem 1984 te naduh bala sdang ia ka, ka SMC ka hap ban thaw ki lad ki lynti ban ioh pisa ban siew tulop ia ki nonghikai, hynrei dei ha u snem 2015 ba na ka liang ka Sorkar lyngba ka tnad Education jong ka SSA ka la shimti ban ai jingiarap ia ki 2 ngut ki nonghikai bad kane kala pynsting ia ka lyngkor jong ka SMC ban pynmih pisa na ka bynta ka tulop nonghikai.
Hynrei mynta kane ka skul kala don haduh Class V te na ka liang ka SMC kala hap ban thung nonghikai biang sa 2 ngut, hynrei ia mynta ka SMC ka dang lah ban thung tang kawei ka nonghikai. Kumta ban ioh siew tulop ia kane ka nonghikai kaba la don mynta la pynlong noh da ka Fete ban pynmih jingiarap.
Ia kane ka Fete la wan ban plie da u ma Wailadmiki Shylla MLA ka thaiñ kum u kongsan bad la iadon lang ruh u ma Ailad Bhoi MDC JHADC kum u symbud kongsan ryngkat kiwei de ki riew rangbah na ka shnong bad kiba nabar shnong ruh kumjuh.
Ha kane ka sngi la ioh ruh ki jingrwai, jingshad na ki kynnah jong kane ka skul. Na ka liang ka SMC ka pynpaw ia ka jingsngew burom ia u ma Wailadmiki bad ma Ailad Bhoi kiba la shim khia ban poi sha kane Fete. Kane ka long katkum ka jingpyllait khubor na u ma S. Sari.