Ha ka 8 tarik u bnai Nailur 2025 u Bah Reachingson Siangshai u la wan ha ka Office u DC ka EJHD ban leit buh ïa ka ‘Appeal’ kaba nyngkong eh naduh ba u la wad ïa ka RTI jubab ha ka jingïadei bad ka rukom thung kam thung jam hapoh ka District.
Kane ka ‘Appeal’ ka long hadien ba u Bah Siangshai u la dep ban buh ïa ka RTI kaba ar katta ha ka 9 tarik u bnai july 2025, ha shwa kane ka ‘Appeal’ u Bah Siangshai u lah dep ruh ban wan ha Office u DC ban pan jingpynshai ha ka jingïadei na kaei ka daw ba ka Office jong u DC ka EJHD ka pynslem ban ai ïa ka jubab sha u halor ka RTI kaba u lah dep ban buh.
Ïa kane ka ‘Appeal’ la phah sha u DC ka EJHD u Shivansh Awasthi, IAS, Deputy Commissioner uba long ruh u “First Appellate Authority”. Ha kane ka ‘Appeal’ la kdew ruh ba ka RTI kaba u Bah Siangshai u lah dep ban buh u dei ban ïoh ïa ka hapoh ka 30 sngi hynrei na ka daw kaba na ka liang ka office u DC ka pynslem ban ai ïa ka jubab u la pyrshang ruh ban ïakren bad ka dealing Assistant bad na ka liang ka dealing Assistant ka ong ba ka information lane ka RTI jubab ka la long kaba lah pynkhreh bad ka dang don bad u DC hynrei haduh mynta ruh ïa kane ka RTI kaba ar kaba u lah dep ban buh ym pat ïoh ïa ka bad na kane ka daw ka la pynlong ïa u ban buh ïa ka first ‘Appeal’
U Bah Siangshai haba kren sha ki lad pathai khubor u ong ba ïa kane ka first ‘Appeal’ kaba u lah dep ban leit buh lada ym don kaei kaei kaba lah ban pynhun ïa u katkum katta ka jingkwah ka jong u, un leit buh sa ïa ka second ‘Appeal’ katkum ka RTI Act. Shuh shuh u la ong ruh ba ïa kito ki khynnah samla kiba thep kam thep jam hapoh ka District ba kim dei ban sheptieng bad na ka liang ka jong u, u la ong ruh ba u la pynkhreh ba lada jia kumno kumno u la khreh ban leit shaduh ka Court.
