Ka jingïalehkai football (Futsal) kaba neh shi taiew lynter halor ka phang “Goal Beyond Addiction” la plie paidbah ia ka ha Narwan Upper Primary School da u Deputy Commissioner ka East Jaintia Hills, u Shivansh Awasthi, IAS. Kane ka jingïalehkai ka dei shi bynta jong ka Football-Based Intervention Programme kaba ai jingkyrshan ïa ki briew kiba la lait na ka jingdih Drok bad ban kyntiew ia ka koit ka khiah. La pynlong ïa kane da ka District Social Welfare Office ryngkat ka jingïatrei lang bad ka OST Center, Khliehriat.
La donlang ha kane ka jingïalang da u SDO (Sadar) Manish Kumar, IAS, u BDO Dr. R. Pyrtuh, ka DSWO kong R Bareh, u Medical Officer ka OST Dr. J. Nongtdu, ryngkat ki nonghikai, ki khynnah skul bad ki paidbah ka shnong.
Ha ka jingkren jong u DC, u la pynpaw shai bad u la kdew ruh ïa ka jingkordor ban pyniasnoh ïa ki samla ne ki briew kiba la lait noh na ka jingpyndonkam drok sha ka jingïalehkai sports kum kawei ka lad ai jingsumar. U la pynbna ruh ïa ka jingthmu ban seng ïa ka de-addiction center hapoh ka District.
U SDO Manish Kumar u la kdew ba ka jingdih drok ka wanrah ïa ka jingsniew ha ki longïing longsem bad pynduh ruh ia ka bor long briew man briew, u la khot la wer ïa ka jingïatrei lang jong ia baroh ban ialeh ban pynduh ia ka jingpyndonkam ia u Drok. Kine ki arngut ki ophisar ki la sam ruh ia ki (Sports kits) ne ki tiar jingïalehkai sha ki nongïashim bynta.
Ka thong jong kane ka prokram ka long ban iarap ïa ki briew kiba la lait na ka jingdih drok ban pynduna ïa ka jingsngew kwah dih bad ban kyntiew ïa ka koit ka khiah ha ka met bad ka jingmut jingpyrkhat jong ki.
