Shi bynta ban wanrah ïa ka thong bad ka nongrim treikam jong ka Rotary of International, na ka liang ka Rotary Club Jowai ha kane ka 28 tarik kala pynlong ïa ka jingïalang ba kyrpang bad ki para dkhot Rotarian kiba na ka Rotary Club Mahanagar RID-3282 Sylhet jong ka ri Bangladesh.
Ïa kane ka jingïalang la pynlong ha Orchid Inn Thadlaskeiñ ha ka jingïadonlang ka Chatered President Rotary Club Jowai Rtn. E.F. Gatphoh, ïa ka jingïalang la pynïaid da u Rtn. Samehi Laloo, President Rotary Club Jowai, kum ka dak ban ïa burom kylliang hapdeng ki para Rotarian la shim bynta da kaba rwai lang ïa ka National Anthem jong ka Ri India bad ka Ri Bangladesh bad la ïoh ruh ki kyntien pdiang da u Rtn. Rudolf E.Laloo.
Na ka liang u Rtn. S.K. Lato, (MPHF) Director Community Service haba ai jingkren ula pynsngew shaphang ka jingïathuh khana kaba ïajan hapdeng ka Ri Jaiñtia bad ka Ri Bangladesh ha ki por ba synshar jong ki Syiem Jaiñtia, ula ong ba ka jingthmu jong kane ka prokram ka long ban wanrah ïa ka rukom treikam kaba khuid ba suba na ka bynta ka imlang ka sahlang.
U Rtn. Sayed Ashraf, Adviser Rotary Club Mahnagar-Sylhet haba ai jingkren ula ïaroh ïa ka Rotary Club Jowai kumjuh ïa ki dkhot baroh kiba la pdiang sngewbah ïa ki hapoh ka sor Jowai, ula ong kaba donkam ban thaw ki lad ki lynti kumno ban wanrah ïa ka bha ka miat jong kiba bun ba lang da kaba pynsah kynmaw ïa ka jingïadei kaba ïajan hapdeng ka Rotary Club Jowai bad ka Rotary Club Mahnagar-Sylhet jong ka ri Bangladesh.
