Ka All Meghalaya SSA Non Teaching Staff Association ki la pynpaw ïa ka jingbym sngewhun halor ka rai ka ba la mih na ka committee ba la khlieh da u Vijay kumar Mantri IAS, Commissioner & Secretary ka tnad pule puthi ka Rationalization Committee ïa ka ba la thung da ka Sorkar Jylla ha ka ban bishar halor ka jingtyrwa ban kyntiew tulop ïa ki nongtrei SSA jong ka jylla ki ba kynthup naduh ki District, Block bad State level.
Ka President ka Association ka Kong Jeniffer June Synrem ka la ong ba ha kane ka jingialang na ka liang ka Committee kam shym la lah ban shim ïa ka rai ka ba lah ban pynhun ïa ka seng na ka daw ba kim shym la iohlad ban ïatai ïa ki mat ba ka seng ka buh ha khmat kane ka committee.
Ka kong Synrem ka la ong ruh ba na ka liang ka committee kan sa ioh pat ban ïa kynduh ha kine ki khyndiat sngi ha ka ba kin sa ioh ban ïathir khambha halor ki mat jingdawa jong ki. Ka la ong ruh ba lada ka Committee kam pat shym la lah ban pynurlong ïa ki jingdawa jong ka seng, na ka liang jong ki kin ym pat lah ban kynriah ne pynkut noh ïa ka jingshong kyllaiñ mongor jong ki na Madan Malki.
Ka Kong Synrem ka la buh ruh ka jingkyrpad ïa kane ka committee ba kan leh kham kloi ïa kane ka kam ha kaba na ka liang ki dkhot jong kane ka kynhun kin ioh ban leit phai noh sha la ki kam, ki jaka trei jong ki, khamtam sha la ki jong ki ïing ki sem.
Ka la ong ruh ba na ka liang ka kynhun ka la rai ba ïa kane ka jingïakhih ki dang ïaiban bteng tad haduh ba kin da ioh ïa ka jingdawa jong ki kaba long 80% ka jingpynkiew tulop.