Ïa ka National Tuberculosis Elimination Programme shi bynta ban rakhe ia ka ‘World Tuberculosis Day-2023’, ha Jowai la leh burom ïa ka da kaba pynlong ïa ka jingïaid rally ba la shim bynta da ki khynnah skul kaba la sdang naduh Madan dai masi Ladthadlaboh bad pynkut ha Khimusniang Indoor Sports Hall halor ka phang kaba ong “YES! We can end TB”.
Na ka liang ka ophis District Tuberculosis Society, West Jaintia Hills District West Jaiñtia Hills District hadien ka jingïaid rally la pynlong ïa ka jingïalang ban pynsngewthuh ïa ki khynnah skul shaphang kane ka jingpang kaba lah ban pynkoit lada ki nongpang ki wan shakhmat ban phah test ban ïoh ka jingsumar da kaba dih dawai tista.
La ïathuh ba ka sorkar kmie kala buh ïa ka thong kaba hakhmat eh kata ban rad diengkhong noh ïa kane ka jingpang bad ban pynduh jait shi syndon ïa ka hapoh jong ka snem 2025.
Ha kane ka sngi na ka liang ka Additional Deputy Commissioner WJHD kong H.M.L. Kynta haba ai jingkren kum ka kongsam kala ai ka jingïaroh ïa ki nongtrei jong ka tnad ka koit ka khiah naduh ki Doctor, ki Nurse bad kiwei kiba la don ka jingkitkhlieh ban ïarap pynkoit ïa ki nongpang TB.
Kala ong ruh kum ki nongpang kiba don ïa kane ka jingpang ki dei ban leit mih man ka por sha ki jaka sumar bad ban phah test ïalade khnang ba yn lah ban pynkoit kloi ia ki.
Shuh shuh kala ong kaba nyngkong duh ha ka jingim briew dei ban don shwa ka jinglehkhuid la ha ïing ha sem bad ha ka imlang ka sahlang, ka kyrmen skhem lyngba ka jingïatrei lang jong baroh yn sa lah ban pynduh noh ïa kane ka jait jingpang.
La ïoh ruh ka jingkren bad ki jingbatai ba kham bniah shaphang kane ka jingpang bad ki lad jingïada na ka Dr. I. Khyriem, Sr. Medical Tuberculosis Officer, Jaiñtia Hills Jowai, ka Dr. E.B.V. Laloo, District Tuberculosis Officer Jaiñtia Hills Jowai. Ha kaba la ïoh ruh ka jingkren na ki ar ngut ki kynthei kiba la koit na kane ka jingpang (TB Champion).
Ha kane ka sngi la ïadonlang u Waheh Shnong ka Khimusniang ma A. Lamare, U Assistant Waheh Shnong ma J.M Pohsngap, ki nongtrei ka DTS, ki khynnah skul nalor kiwei de. La sam ruh ïa ki khusnam sha ki khynnah skul kiba la jop ha ki jingïakop bapher bapher bad ïa ki nongtrei ka koit ka khiah kumjuh ïa ki Asha. Ïa ka jingïalang la pynïaid da u ma Pynkhreh Susngi DPC-NTER.