Ka jingiakynduh lang (Joint Meeting) kaba ar hapdeng ka KSU Narpuh Circle bad ki Rangbah Shnong ka thaiñ Elaka Narpuh kaba la long mynnin 03/08/2023 sngi Palei (Thursday) ha Mynkre, ka jingialang da kawei ka jingmut ka la shim ka rai ban iaid shakhmat ban pynlong da ka jingiakhih paidbah ha ka 08/08/2023 sngi ba ar (Tuesday ) halor ka jingkuman bad sngap mynthi ka sorkar bad ka National Highway Authority of India (NHAI) khlem da shimkhia ban maramot ne repair ia u surok ba la sniew palat pud hapoh u pud ka thaiñ Narpuh, kata naduh Mynkre shaduh Ratachera. Wat hadien ba la dep ai ia ka jingthoh sha u DC EJHD ban dawa ia ka NHAI ban sdang maramot hapoh 7 sngi naduh ka tarik ba la submit ia ka memorandum, hynrei haduh mynta ym i dak eiei.
Ia ka shithi kitei ki ar kynhun ki la dep submit ha ka 26/07/2023 bad ka la kut ka jingai por ba 7 sngi kata ha ka 02/08/2023. Haba iohi ym don dak eiei na ka liang ka sorkar ne NHAI ka la pynbor ia ki ar kynhun ban shim ia ka rai ba tyngeh ban pynlong da ka jingiakhih paidbah ha surok NH-6 hapoh thaiñ Elaka Narpuh. Kane ka jingiakhih kan long da ka jingrah placard bad ki jingthoh ban pynrem jur ia ka sorkar bad ia ka NHAI. Ka jingsniew u surok kam long shuh ka sien ba nyngkong, hynrei da ki bun bun snem. Kane ka paw ka jingbym kheiñ snep ia ki paidbah jong ka thaiñ. Ha katei ka jingiakhih paidbah da kaba mih sha surok yn ia lum lang shi jaka.
La kyrpad ia baroh ki kali kamai tourist bad rit bad khraw bad kiba wan nabar jylla kiba iaid lyngba une surok sngewbha ai ka jingkyrshan jong phi da kaba wan iasnoh kti lang ha katei ka jingiakhih da kaba phi sangeh shi sngi ia ki kam jong phi baroh. Naduh ki kali dumper kit mawshun (Limestone), ki kali sumo kamai na Lad Rymbai sha Kalaiñ Badarpur sngewbha sangeh ka kamai jong phi ba tang shi sngi. Ka jingiakhih da ka jingiamih paidbah sha surok kan long naduh ka por 10:00am haduh 4:00pm.
Ka jingiakhih kan long da kaba jai jai ban kiar na kaba thaw jingkulmar namar ka jingiakhih kan dei ban dawa ia ka hok ba shong nongrim. Ki kali kit nongpang, kali nongthoh khubor bad kiwei kiwei kiba don kam kyrkieh ne emergency kin iaid kumba juh long. Ha Kane ka jingiakhih ngim kwah ban don kiba shim kabu ban wanrah ki jingpynkulmar, lada don kum kita, ka seng bad ki rangbah shnong kin ym shim ka jingkit khlieh.
