Ka Sein Raij Laskeiñ Block Committee Nalariti (SRLBCN), kan pynlong ïaka jingïakop peh khaw ne ka Dorbar Kynrih Khoo Under 14-18 & Open to All, ha ka 23 tarik u Rymphang ha Raij Mynkrem Elaka Shangpung, West Jaiñtia Hills District, kum shi bynta ban pynkhie im biang ïa kane ka rukom hikai jong kiba rim ba jah.
La ïathuh kumba long mynta bun na ki kynthei kim nang shuh ban peh khaw (kynrih khoo) bad na kane ka daw ka la pynlong ïa ka SRLBCN ban pynlong ïa kane jingïalehkai, khnang ba ki khynnah rit haduh kiba la heh la san kin nang ban peh ïa u khaw hashwa ban shet ja.
Na ka liang ka SRLBCN ka khot bad ka wer ïa baroh ki khun ka bri u hynñiewtrep hynñiewskum kiba dang bat ïa ka ñiam Khasi, Niamtre bad kiba dang ngeit ha ka ñiam rim (thmat ka trong) ba kin wan pynshong shit ha katei ka sngi.
La pyntip ruh ba kane ka dei ka sien kaba ar ban pynlong ïa kane ka Dorbar Kynrih Khoo, kane ka long katkum ka khubor ba la phah da u President ka SRLBCN ma Emjingmut Law.