Kum shi bynta jong ka jingpynsngewthuh paidbah bad ban tehlakam ïa ka jingshong kha khynnah, ka District Legal Services Authority (DLSA), East Jaintia Hills District, ryngkat ka jingïatreilang bad ka ASHA Unit, ki la pynlong ïa ka Legal Literacy Programme-cum-Street Play hapoh ka NALSA ASHA SOP bad ka Bal Vivah Mukt Bharat Campaign ha ka shnong Jalaphet Bri Sutnga bad Jalaphet Bri Sumer.
Ïa kane ka prokram la pynlong hapoh ka jingïalam jong ka Meghalaya State Legal Services Authority (MSLSA), da ka jingthmu ban pynsngewthuh paidbah ïa ka jingktah ka jingshongkha khynnah lyngba ka jingïalehkai.
Ka Chief Legal Aid Defence Counsel, kong R. Manar, ka la kren bad batai ïa ki bynta ba kongsan jong ka Prohibition of Child Marriage Act, 2006 bad kaPOCSO Act, da kaba pynpaw ïa ki shi bun ki jingeh kiba lah ban wanrah ha ka jingiashong kha khynnah.
Ka jingïalehkai paidbah ka la pyni ïa kawei ka jingjia kaba ïadei bad ka jingïathoh shong kurim beaiñ jong u/ka khynnah rit, kaba la lam sha ka kam jong ki pulit pyrshah ïa u kurim bad ïa u nong pyniathoh. Hadien kata, ka Smti. Manar ka la ban jur ba kito kiba leh ïa kum kine ki kam kin shah pynshitom tyngeh katkum ka aiñ bad ka la kyntu ïa ki paidbah ban ai jingtip ïa kum kine ki jingjia lyngba ki Child Helpline number 1098 ne 15100.
Kawei pat ka prokram jingïapynsngewthuh paidbah la pynlong ha Jalaphet Bri Sumer, da ka jingïashim bynta jong ki nongtrei ASHA bad ki Anganwadi, da kaba ban jur ïa ka bynta kaba kongsan jong ki nongtrei paidbah bad ka shnong ka thaw ban pynduh pyrshah ïa ka jingïathoh khynnah bad ha ka jingïada ïa ki hok jong ki khynnah.
