Ki Nongdie madan ki la pynpaw ïa ka jingbynniaw ïa ka jingthmu jong ka Sorkar Jylla ban pynkynriah ïa ki nongdie madan kiba die shabar jong ka Shillong Civil Hospital sha ka jaka ba thymmai ba dang pynkhreh ha Barik, hajan ka ophis jong ka PWD.
U Assistant General Secretary ka Meghalaya Greater Shillong Progressive Hawker & Street Vendor Association u bah Shane Thabah uba la jurip ïa kane ka jaka ba dang shna ryngkat bad kiwei kiwei ki nongïalam ka Meghalaya Greater Shillong Progressive Hawkers & Street Vendor Association ha ka 26 tarik Risaw 2025, u la ong ba ka rukom treikam jong ka sorkar ka long ka bym ïahap, khamtam ha kaba ïadei bad ka thup jong ki nongïoh jingmyntoi ba la pyllait sha ki nongdie madan haba iadei bad ka COV.
U la pynpaw ba ïa ki kyrteng la pynmih lyngba ki kot khubor khlem kano kano ka jingïakren shwa ha ka jingïalang jong ka PTVC. U la kynnoh shuh shuh ba katba ka Shillong Municipal Board ka la ithuh tang 29 ngut ki nongdie madan ha ka jingjurip, hynrei ha ka jingshisha ki don kumba 40 ngut eiei ki nongdie madan kiba shong die madan habar jong ka Civil Hospital.
Ka seng jong ki nongdie madan ki dawa na ka Sorkar ba dei ban iateh ne soi soskular ha shwa ban pynkynriah ia ki sha Barik namar kim shahniah ia ka Sorkar.
