Ka Jylla Meghalaya ka dei kawei na ki Jylla ha India kaba paw bad iaid bha ha ka kam jngohkai Pyrthei. Na ka jinglah ban pyntyllun shuh shuh ia ka kam da kaba wanrah ia ki projek bapher bapher, kane kan iarap ruh ban pyniohkam ioh jam ia ki Samla. Hynne ka sngi ka 23 tarik Jylliew 2025, ha ka jingialang jong ka ‘CM Connect’ ia kaba la pynlong ha Madan Mawkdok, u Myntri Rangbah ka Jylla u la pynbna ba yn wanrah sa kawei pat ka projek kaba heh, kata da ka jingkieng ‘Sky Walk’ ne ka jingkieng ia kaba yn shna da ka ïit kaba dei ruh ka jingkieng ïit ba nyngkong eh ha ka Jylla.
Ia kane ka jingkieng ia kaba yn shna ha Mawkdok, East Khasi Hills yn pynlut haduh 51 klur. Ka jingjrong jong kane ka jingkieng kan long 40 metar bad 7 metar ka jingiar. Ha kaba iadei bad kane ka projek, u MR u la ong ba la dep ban pyndep lut ia ki kam baroh naka bynta ban wanrah ia kane ka thong ba thymmai hynrei yn sdang ban pyniaid ia ka kam hadien 2 ne 3 bnai kata hadien ba kut ka aiom slap.
Haba iathuh shaphang ka jingmyntoi jong kane ka projek, u Sangma u la ong ba kane ka Jingkieng kan khring shuh shuh ia shibun ki briew na kylleng ki Jylla bad hangne la pynbiang lut nadong shadong kynthup ia ka jaka bam, ki dukan bapher bapher ia kaba yn shong hi da ki trai shnong bad ka jaka ieng kali. “Kane ka dei na ka bynta ka jingroi ha ka kam jngohkai pyrthei ha ka Jylla” ong u Myntri Rangbah.
