Hynne ka sngi ki khynnah ïalehkai phutbol ka skul Nongri Presbyterian kaba la mihkhmat ia ka jylla sha ka lympung Subroto Cup International Football Tournament ki la wan phai ryngkat ka khusnam kum ki lahduh jong katei ka lympung kaba heh hapoh ka ri India.
Ha katei ka sngi, u MLA/MDC ka Mawhati constituency, Bah Charles Marngar da ka jingsngewsarong u la leit ban pdiang burom hi ia kitei ki nongjop ha kad liengsuiñ Guwahati kiba la wanrah ka nam ia ka constituency bad ka jylla baroh kawei. Ha katei ka jingpdiang burom la don ryngkat ruh u Asst Director Sports, ADC Bah Shanlang Warjri, DSO Bah Bobby Nongbet bad kiwei kiwei.
Kum ban shu pynkynmaw kane ka kynhun kaba la ïakhun final ha ka thup ki khynnah kiba hapoh 15 snem (under 15) ki la lah ban pynliem ia ka skul na Uttar Pradesh da 3-0 kol.
