Shi bynta na ka Swachh Seva 2025 hapoh ka Swachh Bharat Mission 2.0 ka Jowai Municipal Board (JMB) kala pynlong ïa ka jingpyni nam (exhibition) halor ka ‘Best Out of Waste’ kaba la long mynta ka sngi 26 tarik Nailur ha Chutwakhu Indoor Hall, Chutwakhu, Jowai.
Ha kane ka jingïalang lawan ban ïashim bynta da ki skul na kylleng ka sor Jowai, ha kaba ki samla pule kila ïoh lad ban pyni ïa ki juk stad thymmai, halor ki rukom pynïaid ïaki jaboh, ka rukom jingpynkylla dur bad ban pynneh pynsah ïa ka mariang ban lait na ki jaboh.
Na ka liang u ma Wailadmiki Shylla, myntri ba dei peit ïaka tnad ka koit ka khiah, ka tnad ïalehkai Sports ula wan ban jurip ïa kane ka jingpyni nam bad ban ïakren ïa ki samla pule.
Ka kong D.V Lyngdoh, Chief Executive Officer (CEO), Jowai Municipal Board ha ka jingkren pdiang burom kala pyntip ba ïa kane ka prokram Swachh Hi Seva 2025, shi bynta jong ka Swachh Bharat Mission 2.0 la rakhe naduh ka 17 tarik u Nailur haduh ka 2 tarik u Risaw, 2025 kum ka lad ban ai jinghikai kumno ban wanrah ïa ka khuid ka suba.
U ma Wailadmiki Shylla haba ai jingkren ha kane ka jingïalang ula ai ka jingïaroh ïa ka kong DV Lyngdoh, CEO ka JMB bad ka kynhun jong ka halor ka jingpyrshang ban pynlong ïaka Jowai Municipal Board kum ka tnat treikam kaba treikam bha. Ula ai khublei ruh ïa ki nongïalam shnong bad ki nongshong shnong jong ka sor Jowai kiba la bteng ban kyrshan ïa ki jingthmu ba bha jong ka JMB.
Ula pynsngew ha u snem 2018, ka Jowai Municipal Board ka ïakynduh shibun ki jingeh, hynrei ki nongtrei jong ka kila aiti lut ban trei hok ïa ka kam khamtam haka por COVID-19.
Ïa ki nongjop haka jingpyni nam la sam da ki syrnot bad ka song pisa, na ka ling ka H.K Singh Memorial Higher Secondary School, Jowai kala ïoh ïa ka nam ba nyngkong ha ryngkat ka pisa kaba T.30,000/-, ka Khimmusniang Presbyterian Secondary School, Jowai kala ïoh ïa ka nam kaba ar kaba T.20,000/-. Katba ka ka Government Girls Higher Secondary School, Jowai kala ïoh ïa ka nam ba lai bad ka song pisa kaba T.10,000/-.
Ki skul kiba jop pat haka jingpyni ïa ka ‘waste management’ ki long ka St. Mary Mazzarello Girl’s Higher Secondary School, Jowai ka la ïoh ïaka nam ba nyngkong ryngkat ka song pisa kaba Rs. 70,000/-, katba ka North Liberty Higher Secondary School Jowai kala wan ba ar ryngkat ka pisa Rs.50,000/-, katba ka Tpep Pale English School, Jowai, ka Khimmusniang Presbyterian School, Jowai bad ka H.K Singh Memorial School, Jowai kila ïoh mar Rs.25,000/-.
Haba phai pat sha ki dong kiba ïoh ïaka khusnam haka liang ka khuid ka suba ki long ka Chiliang Raij kala ïoh ïa ka khusnam kaba nyngkong da ka song pisa kaba Rs. 70,000/-, bud sa ka Tpep Pale Locality ba ar kaba long Rs. 50,000/- bad ka Lumkyrwiang ïa ka nam kaba lai da kaba ïoh Rs.35,000/-
Ha kane ka sngi u Myntri ula sam ruh ïa ki tin bret ñiut sha baroh ki khlieh nongsynshar jong ki dong bapher bapher bad ki skul hapoh ka sor Jowai.
