U symbud Myntri Rangbah u Sniawbhalang Dhar mynta ka sngi 23 tarik nailur 2024 u la wan jurip ia ka Umroi Airport.
Ha kane ka sngi jurip la don ryngkat lang da u Chief Secretary ka Sorkar Jylla, DC jong ka Ri Bhoi, MLA jong ka Umroi MDC, ki Ophisar jong ka tnad liengsuin jong ka Airport Authority jong ka India bad ki Ophisar Sorkar jong ka Jylla.
Ka jingwan jurip jong u symbud Myntri Rangbah ia ka Umroi Airport ka dei halor kum shibynta ban pynheh shuh shuh ia ka Airport ha Umroi bad ban pynbun shuh shuh ki liengsuin ha kane ka Airport ban pynsuk ia ka leit ka wan ki paidbah ka Jylla.
Haba kren sha ki lad pathai khubor hadien ba la dep jurip u ma Sniawbhalang Dhar u la pyntip ruh ba dang donkam sa 16 acre ka jaka ban pynheh na bynta ka jingshngaiñ jong ki liengsuin.
U la ong ruh da kumno kumno ka jinglut ha kane ka jingpynheh ia ka Umroi Airport kan kot sha ka 500 klur bad yn bei tyngka da ka Sorkar pdeng, haba iadei bad ki jaka yn bei da ka Sorkar Jylla.
U la ong ruh ba lada kane ka jingthmu ka urlong ban pynheh ia ka Airport kan iarap shibun ia ki khun samla ba kin ioh kam ioh jam kiba kynthup naduh ki ba niah kali, kiba buh dukan bad kumta ter ter.
