Ka Rationalization Committee kaba la thaw da ka sorkar jylla ban peit bniah ïa ki jingdawa ka All Meghalaya SSA Non Teaching Staffs Association (AMSNSA) ka la shim ïa ka rai ban ai da ka jingthoh kum ka kular halor ka jingdawa ka Association.
Haba kren sha ki lad pathai khubor hadien ka jingïalang kaba ar ha ka 5 tarik u Naitung2024, ka kong Jennifer June Synrem, President jong ka All Meghalaya SSA Non – Teaching Staff Association(AMSNSA) ka la ong ba ka jingïakren mynta ka janmiet ka la seisoh ha kaba na ka liang ka committee ki la kham sngap ïa ka jingdawa jong ki da kaba pyntip ba na ka liang ka sorkar kan sa ai da ka jingthoh sha ka Association ha kine ki khyndiat sngi kiba dang wan na ka bynta ban pynurlong ïa ka jingdawa ka jong ki.
