U District Magistrate jong ka East Jaiñtia Hills District u la pyntreikam da ka Section 163 ka BNSS na ka daw ba ka seng kaba tip kum ka Gau Dhwaj Sthapana Bharat Yatra, kaba thmu ban pynlong ia ka jingiaid paidbah ha ka jylla Meghalaya ha ka 2 tarik u October, 2024, namar kane ka seng kam shym la pan bor ban pynlong ia kane ka Yatra.
Kumta u DC u la ong ba kane ka Rally ka lah ban wanrah ia ka jingktah ia ka suk ka saiñ hapoh ka District. Kumta la khang ia kino kino ki jingiaid paidbah kum ka Procession ne Rally kaba ktah ia ka shong suk.
La khang ruh ban ialum palat ia ka 5 ngut ki briew ha ka shi jaka bad kumjuh ruh la khang ban iaid lang ki briew palat ia ka 5 ngut ha kano kano ka rally ne Procession.
Lada lap ia kino kino kiba leh pyrshah kin shah pynshitom katkum ka Section 223 ka Bharatiya Naya Sanhita 2023.
Kane ka hukum kam treikam ia ka jingiaid paidbah jong ki niam kiba la ioh bor bad kiba bud kat kum ki ka kyndon jong ka aiñ.
