Ka Shillong Cricket Association (SCA) ka la pynbna paidbah ia ka lympung ialehkai T20 jong u Late P. A. Sangma Memorial T20 Tournament, kum ka jingkynmaw burom ia u nongialam ba pawkhmat jong ka jylla u (L) Purno Agitok Sangma bad ia kane ka jingialehkai yn sdang ha ka 9 tarik u Lber 2026 ha madan kriket Polo Shillong.
Haba kren sha ki lad pathai khubor ha ka 6 tarik u lber 2026, u Treasurer ka SCA u Maki Blah u la ong ba kane ka lympung ka thmu ban kyntiew ia ka jingialehkai kriket ha kane ka nongbah Shillong bad kumjuh ban plie lad ia ki samla ialehkai kriket ban pyni ia ka sap kaba ki don. U la bynrap ruh ba ka SCA ka kyrmen ba kane ka lympung kan khring ïa ka jingkyrshan paidbah kaba khlaiñ bad kan ïarap ruh ban kyntiew ïa ka kriket ha nongbah Shillong bad ha kylleng ka jylla Meghalaya.Katkum ka jingong u bah Blah, ki don 20 tylli ki kynhun ban iashim bynta ha kane ka lympung, ba kynthup ia 18 tylli ki kynhun na Shillong bad 2 tylli na Assam, kaba pyni ia ka jingiashim bynta kaba kham jylliew bad ka jingiatreilang ha ki kam ialehkai hapdeng ki jylla ba marjan.
Ha kane ka sngi u President ka Meghalaya Cricket Association (MCA) u James K. Sangma u la pynpaw ba ka ïing ka sem jong u Purno A. Sangma ba la khlad noh kan bei tyngka ïa kane ka lympung ïalehkai. Katba ia ki kam pynïaid iew bad pynïaid ïa ki jingïalang yn pynïaid da ka Pritvi Events and Sport hapoh ka jingïalam jong u Rishiraj Talukdar. U James K. Sangma u la iaroh ruh ia ka Shillong Cricket Association kaba la shimkhia ban kyntiew ia ka kriket ha ka jylla. U la ong ba ka Meghalaya ka don shibun ki samla kiba don sap ha ka jingialehkai kriket hynrei ki donkam ia ki lad ki lynti kiba khlain ban iarap ban kyntiew ia ka sap jong ki.
Shuh shuh u la pynthikna ba ka Meghalaya Cricket Association kan ai ka jingkyrshan kaba pura ïa kane ka lympung, da kaba batai ba ka dei ka rynsan kaba biang bha na ka bynta ki samla ïalehkai ban pyni ïa ka sap bad ka jingkiew shaphrang jong ki ha kane ka jingïalehkai.
Nalor kata, u la pyntip ruh ba ka MCA ka dang trei ban pynkhlaiñ ïa ka jingïatreilang bad ka Board of Control for Cricket in India (BCCI) ban pyniar ïa ki jingtei bad ki prokram pynroi ïalehkai kriket ha baroh ki district jong ka jylla Meghalaya, ban pynthikna ba ki samla ïalehkai kin ïoh ïa ki lad ki lynti kiba kham bha. Ka Late P. A. Sangma Memorial T20 Tournament kan long ka jingïalehkai kaba itynnad ka ban khring ïa ka jingsngewtynnad jong ki paidbah bad kan ai mynsiem ruh ïa ki samla ïalehkai kriket ha ka jylla ban ïai bteng ïa kane ka jingïalehkai bad ban kyntiew ïa ka jingim jong ki.
