Ka District Legal Services Authority (DLSA) West Jaintia Hills District ha ka 27 tarik u Nailar 2025 ka la pynlong ïa ka Legal Awareness Programme ha ki ar tylli ki jaka kawei ha St. Peter Higher Secondary School, Barato bad kawei ha Mother Elizabeth School for Visual Blind, Nangbah.
Ha kane ka prokram ba la pynlong ha shnong Barato, la ai jingpynshai halor ka Protection of Women from Domestic Violence Act, da kaba pyntip paidbah ïa ki aiñ bapher bapher kiba lah ban iada ia ki kynthei na ka jingshah thombor bad ruh ki aiñ kiba lah ban pynioh ia ka hok jong ki.
La pynlong ruh ka jingai jinghikai halor ka Substance Abuse & NDPS Act, da kaba pyni ïa ki jingma jong ka jingdih drok bad ki jingpynshitom kiba dei hapoh ka aiñ. La kyntu ïa ki khynnah skul ba kin long ki nongpynsaphriang jingtip hapoh ka imlang sahlang khnang ban ïada na kine ki jingma.
Ki Resource Person jong kane ka sngi ki kynthup ïa ka kong M. Lamare, Deputy Chief Legal Aid Defense Counsel bad u bah F. B. Passah, Assistant Legal Aid Defense Counsel, kiba la ai jingpynshai bad jinghikai halor kine ki phang kiba donkam.
Ha ka prokram kaba la pynlong ha shnong Nangbah pat la ai jingpynshai halor ka SAATHI Scheme, ka Child Rights bad ka Rights of Persons with Disabilities Act (RPwD Act). La iathuh halor ki jingmyntoi bad ki hok kiba la buh kyrpang ban ïarap ïa ki khynnah bad ki briew kiba don jingduna, kumjuh ruh ban ïada na kino kino ki jait jingshah lehbeiñ lane jingshah khanglad ha ka imlang sahlang.
Ki Resource Persons jong kane ka sngi ki long, ka kong D. G. Kharshiing, Secretary, DLSA, kong D. Sutong, Chief Legal Aid Defense Counsel bad kong F. Lyngdoh, Assistant Legal Aid Defense Counsel.
Kiba la ai jingpynshai bniah bad jinghikai halor ki phang kiba donkam jong ka aiñ ban pynsngewthuh ïa ki khynnah bad ki nonghikai.
