Ha ka thong ban khring ïa ki khynnah shaphang ka sngi kyrpang ka jingïohlaitluid ka Ri India, ka School Managing Committee jong ka Lumtyngkrain SSA LPS, Thadlaskeiñ Block ha ka 12 tarik August ka la pynlong ïa ka lehkmen Advance Independence Day Celebration 2023.
Ha kane ka sngi nalor ki khynnah skul lawan ban ïadonbyntalang ruh da ki longkmie longkpa kum ban ai mynsiem ïa ki khun ki kti jongki kiba pule ha kane ka skul.
Ha ka jingïalang ba la pynïaid da u Andro Lyngdoh, Chairman SMC Lumtyngkrain SSA LPS laioh ka jingkren pdiang pdiang burom na ka Preciously Mary Syntem, Headteacher Lumtyngkrain SSA LPS, ka jingkren ai mynsiem bad batai ïa ki khynnah shaphang ka nongrim jong ka Independence Day na u Sambha Tyngkan, Programme organizer bad na u S.D. Laloo, DCCM-SSA, West Jaiñtia Hills bad haba kut pat jong kane ka jingïalang ka Perio Dhar, CRP Mukoh Cluster ka la ai ki kyntien khublei.
U Sambha Tyngkan haba kren ha ka thong ban kyntiew ïa ka pule puthi ula ong ba ka jingïatreilang ba ïajan hapdeng ki khynnah skul, ki nonghikai bad ki longkmie longkpa ka long kaba donkam bad u da khot bad wer ruh ïa ki longkmie longkpa ba kim dei ban ailad ba ki khun ki ksiew jong ki kin pep skul shiteng por ne pynduh ïa ka hok jongki na ka bynta ba ïoh ïa ka jingnang jingstad namar ka jingnang jingstad ka long ka waitlam ban prat lynti ïa ka jingsahdien sahdum jong ka longbriew manbriew, ka ïing ka sem bad ka shong ka thaw.
Ka jingkren jingbatai kyrpang halor ka Independence Day la ai da u S.D. Laloo, ha kaba u la ong ba ka jingrakhe pyndonburom ïa ka Independence Day ka long kawei na ki jinglehkmen ka Ri ban kynmaw burom ïa ka kyrteng bad ka nam ki nongïalehlaitluid ki khlawait ka Ri kiba la aiti ïa la ka jong ka jingim na ka bynta ka ri bad ka jaitbynriew bad kyrpang ruh ula ïathuh khana ïa ki khynnah shaphang u who Kiang Nangbah, khlawait ka Ri Khat-ar Dolloi, uba la shah phasi ha ki shipai ka Sorkar Phareng ha ka 30 tarik Nohprah 1862 bad ki kyntien Blei kiba ula kren shwa ba kin phasi ïa u ki long shisha ka sakhi sabut ïa ka ri Khat-ar Dolloi kumjuh ïa ka Ri India kaba laïoh ïa ka jinglaitluid na ka sorkar Phareng tang hapoh 100 snem hadien ba la dep phasi ïa u.
Shuh shuh ha kane ka sngi ladon ruh kiwei kiwei ki prokram lehkmen bad ki ïakop bapher ba kynthup ïa ka General Knowledge, Drawing-Painting, Patriotic Song Competition bad la pynshongshit ruh ïa kane ka sngi da ki chad ba la shimbynta da ki khynnah.
