Ka Ophis u Syiem ka Hima Sohra mynta ha ka 10 tarik Jylliew ha ryngkat bad ki bor pyniaid shnong, ki la pynlong ia ka jingiaid rally kum ka dak ban pynrem halor ka jingshah kynthoh ka shnong Sohra kum ka jaka ba bun ki kam sniew.
Ha kane ka sngi ba iaid rally la sdang na ka ophis jong ka Hima Sohra bad la iaid lyngba ka ïew Sohra bad la pynkut ha ïing dorbar jong ka Saitsohpen.
Kiba ka wan iashim bynta ha kane ka sngi ki kynthup naduh u MLA ka Sohra Konstituensi u Bah Gavin Myllem, u MDC ka Sohra ka Konstituensi u Bah Titos W Chyne, u Syiem ka Hima Sohra u Freeman Sing Syiem, u SDO ka Sohra Civil Sub Division u Mark A Challam, ki myntri ka Hima Sohra, ki nongpyniaid shnong, bad ki paidbah nongshong shnong ka Sohra.
Haba kren ha kane ka sngi na ka liang U MLA ka Sohra u Bah Gavin Mylliem u la ong ki khubor ha ki taiew ba ladep ka la pyndum ia ki paidbah. U la ong kane ka peace rally ka long ka jingsneng ia baroh ki paidbah bad ka jingshngaiñ ym tang ia nongwan jngohkai hynrei ia ki paidbah ka thaiñ Sohra.
U ai khublei ia ka tnad pulit hapoh ka jingialam jong ka DGP, SP bad ki pulit ka tnad Sohra kiba la trei shitom ha ban lap ia ka jingshisha baroh halor kane ka jingjia ha Sohra.
U la kyntu ia ki trai homestay kidei ban iatreilang ba ka dorbar shnong bad ka sorkar jylla lyngba ka tnad kam jngohkai.
U la pynpaw ka khubor sngewlem sha ki bahaing bahasem halor ka jingkhlad noh u Raja Raghuvanshi u nongwan jngoh kai na indore uba la shah pyniap ha ka lok jong u ka Sonam Raghuvanshi.
Na ka liang u MDC haba ai jingkren ha kane ka sngi u la pynpaw kumba 17 sngi ka la iaid beit tang ki khana Sonam bad Raja, ym don khana shuh da kumwei.
Kane kadei ka jingjia kaba sngewsih bad kaba pynkyndit bynriew.
Kane ka rally kam dei ka khubor tang ia ki bar jylla hynrei kan dei ruh ka khubor ia ki paradoh parasnam.
U la ai jingiaroh ia ka kynhun pulit, ki local guide, ki taxi associations bad ki dorbar shnong bad kiwei kiba la ai ka jingiatreilang.
Ula ong ba un iakren bad ka sorkar ba kidei ban don ia ka system ban tip ia ka rung ka mih ki tourist ban long kum ka lad jingiada.Khatduh u la ong ban pynthikna ba nangne shakhmat ngin don ia ka jingkitkhlieh na bynta ki paidbah bad ngin nang pynthymmai ia ka kam jngoh kai pyrthei ha ka thaiñ sohra.
