Ka ‘Khooid Ya Ka Wah Myntdu’ kawei na ki kynhun treimon sngewbah kaba peit ïa ka khuid ka suba ki talawiar jong ka Wah Myntdu, ha kane ka 1 tarik u Naiwieng, 2024 kala pynlong ïa ka Awareness Programme ha ïing Dorbar Hall ka Loomkyrwiang, Jowai.
U ma Khroo Lamsalanki Pariat, President ka KYM kum u shongknor ha ka jingkren pdiang ula pynsngew halor ki kam kiba kane ka seng kala dep ban ïaid lynti naduh bala seng ïa ka, kata ban ai jingïada ïa ka Wah Myntdu na ki jingshah pynjot ha kiba bun ki liang.
U ma Ruhipaia Lamar, ha ka jingkren kum uwei na ki dkhot ka seng ula pynsngew shaphang ka wah Myntdu kaba long ka wah bala wan da ka hukum Blei bad kaba ker talawiar ïa ka shong Jowai bad ka nongbsa umbam umdih.
Ha kane ka sngi la ïoh shibun ki jingkren kynthup ïa u ma Daioolang Pakma Symbud Waheh Shnong ka Loomkyrwiang ban wad ki lad ki lynti kumno ban ïada ïa ka Wah Myntdu kaba pyndap um ïa ki nongrep kiba don ha shi lynter ka Wah.
La buh ruh ka jingkyrpad ïa ki nongshong shnong ba kin don ka jingkitkhlieh bad ban ïatreilang bad ka seng KYM ban dawa na ka sorkar ban pynlong ïa ka Wah Myntdu kaba khuid ba suba ha kine ki sngi ban wan.
La pynkut ïa kane ka Awareness Programme da ki kyntien ai khublei na u Daohi Manner uwei na ki khun samla uba la don jingmut ban pynmih ïa ka kot shaphang ka Wah Myntdu ban ïoh pule ki khynnah ha ki skur.
