Ka Ephphatha Society kaba dei kawei na ki Society kaba peit ia ki briew kiba don jingduna haki dkhot met ne ki briew kiba don ia ka sap kyrpang ryngkat ka jingiatreilang ka Meghalaya Liberation Association of Visually Impaired bad ka Meghalaya People’s Outreach, kila pynlong ia da ka jingiaid rally kum shi bynta ka jingrakhe ia ka sngi kaba la tip kum ka World White Cane ne ka sngi jong kiba don ka jingduna ha ka bor iohi, ia kane ka jingrakhe la pynlong halor ka phang “Treat Everybody Equally”.
Hashwa ka jingsdang jong ka jingiaid rally la don ka jingialang kaba lynkot ha phyllaw ka State Bank of India Lad Rymbai, ha kaba la pyniaid ia ka jingialang da u Benister Kharpor Meghalaya People Outreach, la ioh ruh ki jingkren na u Elkin Rynniaw President Meghalaya Liberation Association of Visually Impaired kat la kaweh ia ka lama (Flag off Rally) da ka kong Melody War Additional Public Prosecutor bad Additional Pleader and Juvenile Justice Board Member East Jaintia Hills District bad kane ka jingiaid rally ka la sdang naduh Lad Rymbai ter ter bad pynkut haduh ha ophis jong ka Ephphatha Society kaba doh ha Moowakhu EJHD.
Hadien ka jingiaid rally la don ka jingialang ha ophis ka Ephphatha Society kaba la pyniaid da u Serious Dkhar Statistician ES, katba ia ka Sign Language Interpreter la ai da ka Ridamon Mynsong Secretary M. LAVI, ha kaba u Deputy Commissioner ka EJHD u Abhilash Baranwal u la long u kongsan ha ka jingdonlang u Additional SP ka EJHD bah B. Jyrwa, ma C. Tlang Waheh Shnong Dkhiah West, ki dkhot ka Meghalaya Liberation Association of Visually Impaired bad ka Meghalaya People’s Outreach bad kiwei.
Na ka liang u DC haba kren u la ai jingiaraoh ia kane ka Society bad Association kiba la wan shakhmat ha ka jingiadei bad don ka jingiatylli bad ka jingiarap markylliang, naka liang jong u, u la kular ban donlang bad ki ha kano kano ka kam jong ki bad kumjuh ban iarap ia ki ha kino kino ki por lyngba kine ki society bad association jong ki.
U bah Jyrwa Additional SP, haba kren u la ong ba ngi wan hangne ban rakhe lang ia ka jingjop jong ki dkhot kaba ai jingtip shuh shuh ia kiwei pat da kaba u la ong ba na ka liang jong ki bor District ne ka ophis u SP ngi wan lang ki la d ki lynti ia ki jingdonkam jong ki bad u la ong ba hapoh ka ophis jong u SP dei ban don uwei ne kawei ki ophisar ban sngewthuh ia ka Sign language jong ki.
Ha kane ka sngi la don ruh ka jingpynkup burom iaki dkhot ka Ephphatha Society, Meghalaya People’s Outreach bad kiwei.
