Ka shnong Wahkaji kaba hap ha ka District South West Khasi Hills, kaba dei ruh ka shnong kaba la ïohsngew bad paw bha na ka jingdon u marpoh khyndew ba remdor ia kaba la tip kum u Uranium ha ka shnong ba marjan, kata ka Mawthabah ka la rakhe ia ka sngi Laitluid kaba 78 jong ka ri India baroh kawei da kaba pyllait ia ki dohkha ha 4 tylli ki wah, da kaba pynkhuid shnong bad kiwei kiwei.
Lah ban ong ruh ba kane ka jingrakhe mynta u snem kadei ruh kum ka jingpynneh ia ka mariang, ki dohum bad ka jingkhuid ka shnong ka thaw. Ia kane ka program la pyniaid da ka Seng Samla Shnong Wahkaji.
Kawei na ki daw ba la ïoh ban pyllait ia ki dohkha ha ki wah shnong, kadei na ka jingduhjait noh ki dohum na ka jingpyndonkam jong ki katto katne ia ki dawai pyniap dohum. Nalor kata, kawei na ki program ba kham pynshongshit bad kaba pynmyntoi ruh kadei na ka jingioh ban pynlong ia ka jingiakob tam plastic ryngkat ka khusnam ia ki nongiashim bynta. La bteng ruh da kaba shna ia ki kynja phalor ban set ia ki mrad kiba lait ne pyllait laitlan khnang ban pynneh ka jingkhuid ka shnong, kynthup ruh ia ki jaka bret ñiut ha man la ki dong.
Kane kadei ruh ka synjam kaba bha, kaba myntoi bad ka ban ai mynsiem ruh ia kiwei pat ki shnong ban sumar ia ki jingai ba kordor u Blei, ban pynneh pynsah ia ki matti ki longshwa bad ban iai bat ia ka jingleh khuid.
La pynkut ia kane ka program da kaba pynlong ia ka jingialehkai phutbol paralok (Friendly Match) hapdeng ki samla bad samla Rangbah ka shnong Wahkaji.
