Ha ka jingrakhe ia ka sngi laitluid kaba 78 jong ka Ri India, ka Akhil Bharatiya Vidyarthi Parishad (ABVP) Shillong Unit ka la pynlong ia ka “Tiranga Rally” ha nongbah Shillong kaba la pyni ia ka lama ka Ri kaba itynnad bad kaba jrong haduh 75 meter.
Ïa kane ka jingiaid paidbah la pynlong shi bynta ban pynpaw ia ka jingkhlaiñ jong ka jingieit ri bad ka jingïatylli, ha kaba palat 200 ngut ki samla, ki samla pule, bad ki nongshong shnong na kylleng ka nongbah Shillong ki la ïashim bynta ha kane ka jingïaid paidbah da ka jingsarong da kaba rah ïa ka lama lai rong lyngba ki surok jong ka sor.
Ïa kane ka jingïaid paidbah la ïalam da u Shri Bomsing Khongtir State Joint Secretary ABVP Meghalaya bad ka Miss Nibiang Sumer ka dkhot ka Central Working Committee jong ka ABVP, ryngkat kiwei pat ki Dkhot (Karyakarta) kiba la ia shim bynta lang bad kiwei pat ki riew pawkhmat jong ka Seng.
Ka jingialam jong ki ka la ai mynsiem ïa ki nongïashim bynta, katba ki ïaid paidbah ban burom ïa ka jinglaitluid jong ka jaidbynriew, kaba pyni ïa ka jingkhlaiñ bad ka jingïatylli jong ka ri India.
Kane ka jingiaid paidbah ym tang ba ka pynpaw ia ka jingrakhe ïa ka jinglaitluid jong ka jaidbynriew hynrei ka la iarap ruh ban pynrung ïa ka jingsngew sarong jaidbynriew kaba kham jylliew ha ki samla. Ka Tiranga Rally ka long kum ka jingpynkynmaw ia ki jingaiti bad jinglen lade jong ki long shuwa man shuwa ba la aiti ia la ka jingim na ka bynta ka jinglaitluid jong ka ri. Bad ka thmu ruh ban pynshlur ia ki samla ban noh synniang shitrhem sha ka kam tei na ka bynta ka jingbha jong ka Ri bad jaitbynriew.
