Ki khun ki hajar ka Labang Nongphyllut ka jaka kaba dei shibynta ha ka Block -1 ha ryngkat ka jingsynran lang u Paiem Laborious Manik S Syiem, ha ka 5 Tarik Nailur 2024 ki la wan ban iakynduh ia u Myntri Rangbah ka jylla u Conrad K Sangma ban pynsngew halor ka jingkwah jong ki ban don noh sha ka jylla Meghalaya.
Ha kaba iadei bad kane na ka liang, ki Khun ki hajar ka Labang Nongphyllut ki la wan aiti da ki kot ki sla, ki dulir ban pynshisha ba ki dei ki shnong ki ba hap hapoh ka Hima ki 12 Doloi.
Haba kren bad u Pa'ïem Laborious Manik Syiem, u ba long u nongaitien, u la ong ba ha ka jingiakynduh la ioh ban aiti ha u Myntri Rangbah ka jylla, ia ki kot ki sla ki ba long ki sakhi ba ka Labang Nongphyllut ka dei ka shnong kaba hap hapoh ka Jylla Meghalaya khnang ba ka Sorkar kan ioh ban kren ia ka Sorkar Assam ba ka Labang Nongphyllut kam dei jong ka Assam.
U la iathuh ba ha kane ka jingiakynduh ki khun ki hajar ki la ai jingmut ia u Myntri Rangbah ka jylla, ba kat ba ki kam ban pynbeit ia u pud u sam kin dang iaid shakhmat , na ka liang u Myntri Rangbah un shimkhia shwa ban iakren bad ka Sorkar pdeng ba kan thaw da ka Tripartite Authority ka ban kynthup ia ka Sorkar pdeng, ka Sorkar Meghalaya bad ka Sorkar Assam, khnang ba ki kam pynroi ha kane ka jaka kan iaid beit iaid ryntih khlem ka jingpynthud.
"Mynta la 73 snem ki nongshong shnong ka Labang Nongphyllut ka mad ia ki jingeh ki jingshah thombor ki ba ha rukom, nalor kane ka jaka kam don ki surok, ka jaka sumar, kam ioh ruh ia ka umbam umdih, ka bording electrik, kumta ka seng ka la kyntu na u Myntri Rangbah ban thaw da ka Tripartite Authority khnang ba ka Sorkar Meghalaya ne Sorkar Assam kam dei ban mushlia ia ki kam pynroi hynrei kin ia trei lang ban peit ia ki kam pynroi" u la ong.U la kdew ruh ba ka Labang Nongphyllut ka dei ka Hima jong ki 12 doloi bad kumba ka long da ka jingdkhat jubor jong ka Assam ha u snem 1951, bad ia kane la leh khlem ka jingtip ki nongshong shnong kane ka thaiñ , ha kaba mynta 73 snem ki nongshong shnong ki mad ia ki jingeh kiba khraw.
