Baroh ki MDC ka JHADC da kawei ka sur kila ai ka jingkyrshan ia ka Resolution ba la wanrah u CEM ma Thombor Shiwat halor ka jingpyrshah ban pyntreikam ia ka Uniform Civil Code UCC. Ia kane ka Resolution la wanrah mynta ka sngi kaba dei ka sien shong Dorbar Lyiur (Summer Session) jong ka Jaiñtia Hills Autonomous District Council.
Wat ki dkhot jong ka liang pyrshah hapoh ka ïing dorbar ka JHADC ki la ai ia ka jingkyrshan ba pura bad pdiang ia ka resolution kaba la wanrah da u CEM halor ka jingpyrshah ia ka jingthmu pyntreikam da ka sorkar pdeng ia ka aiñ ban treikam ha shityllup ka ri India kaba la tip ka Uniform Civil Code (UCC).
Ka ïing da kawei ka sur kala rai ruh ban ai da ka jingthoh sha ka Sorkar pdeng ba kam dei ban pyntreikam ia ka UCC hapoh ka Jylla Meghalaya namar kane ka aiñ kan ktah ia ki nongshong shnong ka Jylla.
