U Myntri Sorkar jylla ba peit ia ka tnad kam jngohkai Pythei u Bah Paul Lyngdoh u la kren sha ki lad pathai khubor halor ka jingjia ia u Raja Raghuvanshi u nongwan jngohkai Pyrthei na Indore uba la shah pyniap ha Sohra.
Haba ioh ban iakren bad ki nongthoh khubor u bah Paul u la ong ka tnad Pulit ka jylla ka la trei shitom ban lap ia ka jingshisha halor ka jingjia ha Sohra ha kaba u Raja Raghuvanshi u la shah pyniap.
U la ong ba ka sorkar ka shaniah ha ki Pulit ka jylla bad ka jinglah jong ki Pulit ban lap ia ka met u Raja Raghuvanshi ha kaba ki bahaïng ki la kynnoh bad kynthoh ia ki Pulit bad ka sorkar, hynrei da ka jingtrei shitom bad ka jingiarap lang ki nongshong shnong ka sohra, ki nongkiew lum na West Jaintia Mountaineering club, ka State Disaster Response Force (SDRT), National Disaster Respond Force, ki Dorbar Shnong ki Pulit bad ki bor pyniaid District Administration.
Shuh shuh u la ong ka jinglah jong ki Pulit ban lap ia ka jingshisha ka pyni ia ka jingtbit ki Pulit ka Meghalaya .
U la bynrap ha ka por ba jia kane ka jingjia ka la don ka jingshah kynthoh ha ki khubor na ri thor kiba pynbudnam ia ka jylla bad ki pynshit ruh ia ki paidbah ban ktah kti ia ki nong Meghalaya.
U la ong ka jinglah ki Pulit ban lap ia ka jingshisha halor ka jingshah pyniap u Raja Raghuvanshi ka dei da kaba aiwai ha ki briew bad ka Sonam ka la leit pyndem hi ha ki Pulit UP ha ka mynta ka sngi 9 tarik. U la pyntip katkum ka jingtohkit la lap ba ka Sonam ka donkti ha kane ka kam ban pyniap ia u tnga jong ka u Raja Raghuvanshi.
Na ka liang ki Pulit ka jylla kin sa shim da ka sienjam kaba tyngeh ia kiba pynthohbria ia ka jylla halor ka jingkynnoh ba ka Meghalaya ka dei ka jaka ba jur ki kam sniew (crime prone ) kane ka jingjia ka dei ka bym pat ju jia bad kam pat don ruh kawei ka sien ba ki nongwan jngohkai ki shah ktah kti ha ki paidbah ka jylla bad khamtam ha Sohra kaba dei kawei na ki pliang ja ia ki nongsohra lyngba ki nongwan jngohkai pyrthei, ka long kaba eh ba ki briew kin kynjat ia ka pliang kaba bsa ia ki.
U bah Paul u la ong ka Shnong Sohra ka dei ka thaiñ kaba la heh bad ban pynbun da ki CCtv ha man ki jaka ka long kumba tuklar noh ia ka kam shimet jong ki nongwan jngohkai.
Haba iadei bad ka jingkylli balei ym pynbun Pulit pahara, u bah Paul u la ong lada ki Pulit ka East Khasi Hills ki leit lut sha Sohra bad lada dap lut da ki Pulit katno ngut ki nongwan jngohkai kin treh ban wan sha kita ki jaka.
Haba iadei bad kito kiba kynthoh ia ka Meghalaya u Bah Paul u la ong ba ki Pulit kin shim da ka sienjam kaba tyngeh ia kiba pynthohbria ia ka jylla.
Haba iadei bad ki sienjam ia ki nongwan jngohkai nangne shakhmat ka sorkar kan sa thung noh shen ia 50 ngut ki Tourist Buddies ha ki jaka kiba bun bha ki nongwanjngohkai kiba kynthup ia ka Sohra, Damsait, Dawki bad Shillong la pynkut u bah Paul Lyngdoh.