Ka Seng JSM Eastern Region & Pamra Unit kum shibynta ban kyntiew kynrong ia ka pule puthi ka stad ka tip sha ki thaiñ Nongkyndong bad kumjuh ban rakhe dap 50 snem ka jingioh ia ka Jylla Meghalaya (Golden Jubilee Celebration) ka Seng ka la kner ia ki lad jingiarap sha ka Pamrakmai RCLP School da ki 10 jur ki Ben bad ki Des.
Ha shwa ban aikti ia kini ki Ben bad ki Des sha ki Nongpeit (SMC) jong kane ka skul la don ka jingialang ba lyngkot ba la pyniaid da u Chairman SMC, u ma Phrangsngi Siangshai ryngkat bad ka jingkren pdiangburom.
Ha kane ka jingialang la ioh ia ka jingkren lamkhmat na u Headmaster jong kane ka Skul u Barius Rymbai u ba la pynsngew ba ia kane ka Skul la seng ia ka ha u snem 1980 kum ka L.P School. Ha ka jingleit lynti ha ki snem ba la leit shadien ka ia kynduh shibun ki jingeh ki jingduna ha ki liang baroh, hynrei da ka jingtrei shitom ki Nongialam Balang ki Nongpeit Nongkhmih barim jong kane ka skul la lah ban pynkiew kyrdan ia ka sha ka U.P School ha u snem 2004. Kumjuh ruh u la pynsngew lyngba kane ka Skul ka la mih ki khynnah kiba la long kum ki Doctors, ki Nonghikai, Ki Police, ki Shipai bad ki Nongialam ha ka Shnong ka thaw ha ka imlang sahlang. Shuh shuh u la pynpaw ia ka jingkmen bad ka jingsngew nguh ia ka Seng JSM ba la iarap sngewbha sha kane ka Skul.
Ha ka Jingkren na u President Rangbah ka Seng u Leningstar Rymbai u la ong ba ka jingstad ha kine ki juk stad ba mynta ka long ka ba donkam bad kordor bha haduh katta katta ka ba ym lah ban die ban thied hynrei ka jingstad hi ka long kum ka Waitlam ba nep aliang syrti ban pyndonkam ha baroh ki liang, da kaba pynshlur ruh ia ki kmie ki kpa ban pynleit skul ban pynstad pyntip ia ki khun ki kti na ka bynta ban long ki lawei ba phyrnai ha ka lashai lashisngi ha ka Imlang sahlang. Da kaba u pynsngew ruh ba kum ka Seng ka la shakri bad lehbha ha kiba bun ki liang ha ka imlang sahlang jong ka Rilum Jaiñtia hi baroh kawei.
Ha ka jingkren na u President JSM Eastern Region u Wellson R D Siangshai u la pynsngew ba ka jingdawa ia ka College Sorkar ha East Jaiñtia Hills ka long ka ba la iaid shakhmat da ka buh jingkyrmen lyngba kane ka Government College kan iarap shibun ia ki duk ki suk jong ka thaiñ, da kaba kyrpad lang ruh sha ki Nongshong Shnong jong ka thaiñ ban iasnohktilang ha ki jingdawa jong ka seng.
Ha kani ka sngi la iadonlang u Waheh Shnong ma Iaikiewbha Rymbai, Headmistress jong ka U.P School Miss Agnes Rymbai ryngkat bad ki Nongialam ka Seng u Eiladmiki Dkhar Discipline Secretary Eastern Region, u Bormi Dkhar Finance Secretary Pamra Unit, Macstarly Dkhar Asst. Finance Secretary, u Letme Siangshai Cultural Secretary, u Firstme Siangshai Asst. Publicity Secretary, ki Members SMC, ki Nongialam Balang, ki Khynnah Skul, ki kmie ki kpa jong ki.
La pynkut da ki kyntien aikhublei sngewnguh na ka Wanpor Dkhar ka ba long ruh ka Nonghikai jong kane ka Skul.
