U ma Nehemayah Tyngkan u kyrtong ka INC na ka 4-Mowkaiaw Constituency ha ka jingïalap Election jong u mynta ka sngi ha madan jong ka Shnong Barato West Jaiñtia Hills ula pynsngew ïa ka thong ba hakhmat eh jong u ban trei ynda ula wan ha ka jingjop ha kane ka kynti jong ka jingïakhun MLA.
Ula ong ba u don ka thong ban pynkiew ïa ki shnong hapoh ka 4-Mowkaiaw naduh ka ïoh ka kot, ka pule ka puthi, ka khaïi ka pateng kaba biang da kaba kular ban shna ïa ki ‘Zonal Development Committee’ kiba treikan lyngba ki Zone-1 ba kynthup ïaka Sanshnong, Barato, Mukroh, Saba, Maitdien. Zone-2 naduh Iongkwan, shaduh sooshnong khadsan shnong, Zone -3 naduh Mynksan Ionglang Niawkmai, Mooshrot shaduh Lamarang. Ka Zone-4 kan hap na Narwan, Kyrweng, Moolum bad ka Zone-5 ka long na ka bynta ka San shnong.
Ula ong ba ka 4-Mowkaiaw Constituency ka don saw tylli ki shnong kiba long ki klong snam ban sam sha kiwei de ki shnong bad kine 4 shnong ki long ka Iooski, Barato, Sahsniang bad ka Mowkaiaw kiba don mar 3 hajar tam ka vote. U kyrmen skhem ba un ïoh biang ban phong biang ïa ka jaiñ spong ha ka sngi ñiew vote jong ka 2 tarik u Lber, 2023 kumba la pynphong ïa u mynta ka sngi da ki nongkyrshan jong u.
Shuh shuh u ma Nehimayah Tyngkan ula pynsngew ïa ka jingjia kaba jia hynnin sngi katba u dang thmu leit pynsngew ïa ki mat treikam jong u ha shnong Sahsniang hynrei ki nongïalam ka shnong Sahsniang kim shah ïa u ban pynlong jingïalang, katba na ka bynta ki paidbah ka shnong Sahsniang ula phla mynta ba un kdup ïeit wat lada ym ïoh ban pynsngew ïa ki nongrim jong u, halor kane ka jingjia ula pynsngew ruh ba kiba bun ki nongalam ka NPP ki la mih ban ban ai jingkyrshan ïa u ha kane ka kynti.
Ula ong “Ha kane ka kynti un wan beit ha ka jingjop lyngba ka jingkyrshan jong ki kup shiliang ki sem shiliang, ha ka juh ka por un long ruh uba kloi ban trei na ka bynta jong ki ha ka jingkhuid jingsuba”.
Ïa ka jingïalang la pynïaid da u Waheh Shnong ka Baroto ma N. Sten ha kaba la ïoh ruh ka jingkren na u ma R. Lamare Secretary shnong Mooshrot, ma Rikut Parien, la wan synrang lang ïa u ma Nehemayah Tyngkan da u MLA ba rim u ma E.C. Bamon ha kaba ki paidbah nongkyrshan na kane ka shnong kila ïamih da ki hajar ngut.
U ma E.C. Bamon ula kular ban don ha syndah bad u ma Nehemayah bad ban pynjop don burom ïa u ha kane ka kynti, ula kyntu ïa ki paidbah da ka ong kumba “phi pynjop ïa nga ha kito ki snem bala dep kyrmen ha kane ka kynti phin pynjop ïa u ma Nehemayah Tyngkan da ka jingïatylli lang kum ki maw byrsiew”.
Shuh shuh ula pyntikna ha kane ka Election ban wan ka Congress kan sa jop bun seat ha Nongbah Shillong namar kin don ki Vote ki bym paw (silence), katba na Ri-Bhoi la tikna ba ki kyrtong ka INC kin jop haduh 4 Seat, u la pyntikna ruh ba u ma Vincent H Pala un sa long u Myntri Rangbah ha kane ka san snem ban wan.
