“Nga ieng ialeh MLA ba nga iohi ia ka jingshah iehbein ki shnong nongkyndong ka 3-Raliang LA Constituency: R.S. Lyngdoh”
Jowai Rymphang 24. Ha ka jingialang paidbah kaba la khot da u ma Richard Sing Lyngdoh u Kyrtong ka Indian National Congress (INC) jong ka 3-Raliang Assembly Constituency hynnin ka sngi (23/02/2023) ha Kyndongtuber da ki hajar ngut ki nongkyrshan jong u ma Richard Singh Lyngdoh na ki shnong bapher bapher jong ka Constituency ki la tuid sha kane ka jingialang.
Ha shwa ban ioh ia ka jingkren na u ma Richard Singh Lyngdoh u Kyrtong (Candidate) jong ka party uba iakhun na ka 3-Raliang Assembly Constituency la ioh ia ka jingkren na ki nongkyrshan ba radbah jong u ma Richard Sing Lyngdoh kum na ka shnong Nongjngi, Khliehrangnah, Pam-manik, Mynsoo,Kyndongtuber, Raliang bad na Muthlong kiba ai mynsiem ia u ma Richard Singh Lyngdoh ba ha kane ka kynti kaba arsien arwat un poi sha ka thong bad ka mir jong ka jingjop.
U ma Richard Singh Lyngdoh haba kren ha kane ka sngi haba u la iohi ia ka jingwan tuid da ki hajar ki nongkyrshan jong u na ki shnong bapher bapher jong ka 3-Raliang Assembly Constituency, u sngewskhem ba ha kane ka elekshon 2023, un ioh ia ka jingjop kaba donburom bad lada un wan ha ka jingjop ka burom ka dei ka jong ki riew ieid party bad ki paidbah paidbah jong ka constituency.
Nangta u ma Richard Singh Lyngdoh u ong ba ka jingieng ialeh jong u na kane ka Constituency ka long haba u la iohi ba ki nongshong shnong ka constituency kiba shong basah ha ki nongrit nongkyndong ki la shah iehbein ha ki nongmihkhmat kiba mynshwa ha kiba bun ki liang kum ki surok,ka dingelectric(light), ki Umbam Umdih, ha ka liang ka jingdon ki jaka sumar kum ki Sub-health Centre, ki Primary Health Centre,ki kam pynroi ri,ka jingiarap ia ki longiing ki longsem kiba duk ha kaba dangdon shibun ki longiing kiba shong ki basah ha ki nongkyndong ban iada na u slap dangbun ki longiing kiba dangsop iing da ki Thadjri ne da ki Plastic. Shuh shuh u ma Richard Sing u ong haba u la iohlad ban poi sha baroh ki shnong jong ka Constituency dang bun ki shnong kiba ym pat ioh surok ban poi sha ki shnong ki thaw jong ki bad ia ki surok kiba la donlypa ruh la dap satang ki thliew ki syar, kiba la jop la pei( deplorable raods) bad la shuieh kumto khlem da pynbha pynmiat ia ki bad halor kine ki jingeh ki jingshah iehbein ki shnong ki thaw da ka jingkyrshan jong ki paidbah khlem pep un wan ha ka jingjop bad ka kamram jong
nga ka long ban shim khia katlah katiai ban thaw ki lad ki lynti kum u nongmihkhmat ban pynbiang ia kine ki jingduna kiba don hapoh ka constituency.
Ha shwa ban pynkut ia ka jingkren bad ia ka jingkyrpad (Appeal) jong u ia ki paidbah ka constituency ban kyrshan ia u ba un wan ha ka jingjop bad haba u la jop, ki paidbah kim donkam ban wad ia u shano u MLA jong ki u don,hynrei haman la ka sngi saitjain un don shisngi, ha Kyndongtuber, shisngi saitjain un don ha Nongjngi, shisngi saitjain un don ha Muthlong-phramer bad shi sngi saitjain un don ha Raliang ba ki shnong kiba marjan kin suk ban wan ia kynduh bad ban iathuh ia ki jingeh jong ki ha u la ka long ha kam shnong kam thaw lane ha ka kam shimet pynkut u ma Richard Singh Lyngdoh ha kane ka jingialangbah( rally) jong u ha Kyndongtuber.
