Ka ïingmane ka Balang Katholik kaba don ha Byndihati, East Jaintia Hills District ka dei tang ma ka, ka Shrine jong ka Dohnud ba khuid tam u Jisu hapoh ka Jowai Diocese.
Mynta ka sngi kala don ka jingleit riewblei (Pilgrimage) sha kane ka ïingmane da ki riew ngeit Katholik, ha kaba da ki hajar ki paidbah na ki 18 tylli ki Parish jong ka Diocese Jowai kila ïatuid sha kane ka jingleit riewblei ha shnong Byndihati.
Ha kane ka sngi ka la don ruh ka jingkñia Mass Yukharish kaba la lam khmat da u Fr. Ferdinand Dkhar, Administrator ka Jowai Diocese ha ryngkat ki Lyngdoh Sohblei (Fathers) kiba wan na ki Parish bapher bapher jong ka Diocese.
Ha kane ka sngi la ïoh ïa ki jingkren sneng kren kraw da u Fr. Ferdinand Dkhar shaphang ka Dohnud bakhuid tam u Jisu, ka Dohnud kaba jemnud, kaba sbun bad kaba dap da ka jingisnei ïa ki briew. Kumta ruh u Fr. Ferdinand ula kyntu ïa ki nongwan riewblei ban pyrthuh bud ïa ka Dohnud bakhuid tam u Jisu ha ka jingim jong ki kaba man ka sngi.
