(Ki nongpang kin ioh Rs.500/- shi bnai ban thied ia ki bam tei met katba ki dang shah sumar)
Kum shi bynta na ka jingrakhe ia ka World Tuberculosis Month 2023 bad da ka jingthmu ban pynduh jait noh ia ka jingpang TB hapoh u snem 2025, ka ophis jong I District Tuberculosis Society, Jaintia Hills mynta ka sngi kala pynlong ia ka jingialehkai surok (Street Play) ha iew Khliehriat, East Jaiñtia Hills, ban pynsngewthuh paidbah shaphang kane ka jingpang bad ki dak ki shin jong ka bad ruh kumno ban pynkoit ia ka.
U ma W. Siangshai, Senior Technical Laboratory Supervisor (STLS), Khliehriat Tuberculosis Unit, ha ka jingkren lamphang jong u, ula ong ba ka jingpang TB ka dei kaba la wanrah da ki khniang jingpang kiba tip kum ki Mycobacterium Tuberculosis. Kine ki khniang jingpang ki long kiba stet bha ban iabit na uwei u briew sha uwei pat lyngba ka lyer, haba u ne ka nongpang TB ki jyrhoh ne synriah. U ma Siangshai ula batai shaphang ka jingktah jong ka TB ia ki tor bad don ruh ka jait TB kaba ktah ia kiwei de ki bynta jong ka met kum ki shyieng bad ki bor iohsngew. Kumta u ban jur ba ka long kaba donkam ban leh ia ka test, ban long kiba leh khuid bad ban bam ki jingbam kiba tei met.
La ioh ruh ka jingkren na u ma L.S. Manner, Senior Treatment Supervisor (STS), Khliehriat Tuberculosis Unit. Ha ka jingkren jong u, ula batai shaphan ki dak ki shin jong kane ka jingpang TB, ha kaba dei ban leit mar mar sha ki jaka sumar sorkar kum ki Civil Hospital, ki CHC, PHC kiba don ha ka District ban ioh ia ka jingleh test kaba mar mar ban lap kloi ia ka jingpang. Kino kino kiba don ia ka jingsngew wit ha ka met kum ka jingjyrhoh kaba neh 2 taiew ne tam, ka jingkhieshoh, ka jingmihsyep por miet, ka jinghiar jong ka jingkhia, ka jingjyrhoh bad ka snam bad ka jingduh ia ka bor mad ki dei ban phah test namar kine ki lah ban dei ki dak jong kane ka jingpang.
U ma Manner ula pyntip ruh ba kane ka jingpang TB ka dei ka jingpang kaba lah ban pynkoit lada u ne ka nongpang ki treh ban dih dawai tista katkum ka jingbthah jong ki Doctor. Nalor kata ki nongpang TB kiba don hapdeng ka jingshah sumar ki lah ban ioh jingiarap pisa Rs.500/- shi bnai ban thied ia ki bam ba tei met haduh ba kut ka jingshah sumar jong ki.
Ia kane ka jingialehkai drama ha ki surok la leh ha ryngkat ka jingshimkular ban pynduh ia ka jingsheptieng jong ka jingpang Tuberculosis da ka jingstad kaba dei, da kaba phikir bad pynduh ia ka jingngewiapher hapdeng kiba don ia kane ka jingpang, ryngkat ka jingbuhthong ba ka ri India kan pynduh jait noh ia kane ka jingpang hapoh u snem 2025.
