Ka Orphan Children Foundation hapoh ka jingïalam u Founder Chairman u Bah L. Dkhar mynta ka sngi ka la bteng biang ban ai jingïarap da ki marbam sa ha ka shnong Nongkynrih West Jaiñtia Hills District sha ki briew kiba don ka jingduna ha ki dkhot met.
Ha kane ka sngi la pynïaid ïa ka jingïalang kaba lyngkot da u Waheh Shnong u ma K. Tyngkan bad la ïoh ruh ka jingkren lyngkot na u Waheh Shnong ula ong ba ka Shnong hi ka pdiang sngewbha ïa ka OCF hapoh ka Shnong jong ki bad ula ai ruh ka jingkhublei ïa ka OCF kaba la poi sa ha ka shnong jong ki na ka bynta ban pynïoh jingïarap ïa ki briew ba don ka jingduna kiba don hapoh ka Shnong Nongkynrih.
La ïoh ruh ka jingkren lyngkot na u Office Secretary ka OCF East Jaiñtia Hills u Samla E. Dkhar haba ula ai jingsngewnguh kaba nyngkong eh sha u Blei Trai kynrad u nongbuh nong thaw bad u la sei ruh ïa u Founder Chairman jang kane ka seng kaba peit ïa ka jingeh jong ki khunswet bad kiba duna dkhot met hapoh jong ka Ri-Lum Jaiñtia hi baroh kawei ba lyngba ka jingsbun jong u Founder Chairman kila ïoh lad ban bteng ïa ka jingiarap bad la ïoh ruh ka jingkren na u Finance Secretary ka OCF West Jaiñtia Hills u Samla P. Sungoh u ba dei ruh u Secretary ka Shnong Biar West Jaiñtia Hills.
Ha kane ka sngi la ïoh ruh ka jingkren na u Founder Chairman jong ka Orphan Children Foundation Jaiñtia Hills u bah L. Dkhar uba la batai ruh ïa ka mat trei kam ka OCF u ong ba ka Foundation hi ka lah ban ïarap Marbam, bai skul bad khamtam ha ka por ba ki pang ki shitom ki khunswet bad kiba duna dkhot met khamtam kito ki long ïing long sem kiba duk ba don kam shisha ïa ka jingiarap.
Ula ong ruh ba ka thong kaba ha khmat duh jong ka Foundation ka long ban pynduh jait shi syndon ïa kito ki briew kiba kren beiñ ne niewbeiñ ïa ki briew ba sah khunswet bad khamtam ïa kiba don ka jingduna bad u la kyrpad ruh ïa ki nongïalam shnong ba kin sngewbha ban ïatrei lang bad ka Foundation khnang ba kan lah shuh shuh ban bteng ïa ka jingïarap.
U bah Dkhar ula pynsngew ‘lada ki khunswet ki ïa kynduh jingeh ki lah ban phone sha ki Volunteer jong ka OCF khnang ba ka Foundation kan lah ban leh ïa kaba donkam’. Ha kane ka sngi la ïa don lang ruh ki Volunteer ka OCF ka kong R. Biam bad u Assistant Secretary Shnong Nongkynrih ki Asha bad kiwei de ki riew rangbah ka Shnong. Kane ka long katkum ka kyrwoh na ka Office Secretary OCF WJHD ka kong M. Bareh.
