Ka Raij Tuber hadien ka jingpynkhreh ia la lehniam Behdeiñkhlam ha baroh shitaiew ka la poi sha kaba kut mynta ka sngi 22 /07/2022 ha kaba da ki phew hajar ki paidbah na kylleng ka Raij Tuber bad nabar ki la iatuid ban ia sakhilang ia kane ka jinglehniam Behdeiñklam jong ka Raij kaba shisien shisnem.
Ha kane ka sngi u Conrad Kongal Sangma, Myntri Rangbahduh ka Meghalaya u la dei ban long u kongsan, hynrei la ong na ka daw ka jingjop President ka Droupadi Murmu u don ha Nongbah Delhi bad u la shu ai jingkren kyrkhu kyrdoh ia ki khun ki hajar jong ka Raij Tuber lyngba ka Video conference.
Ha kane ka sngi pynkut ia ka Behdeiñkhlam la wan ban sakhilang da u bah Renington L Tongkhar ba long u Myntri sorkar ba dei peit ia ka tnat PHE etc, ma Kyrmen Shylla MLA ka thaiñ uba long ruh u Myntri ba dei peit ia ka Revanue, Social Welfare etc, ma Thombor Shiwat Chief Executive Member JHADC, ma Laski Rymbai MDC uba long ruh u Deputy CEM JHADC, ma Brighstar Chyrmang MDC-EM JHADC, ma Finely Bareh MDC, ma Octomewot Lamin MDC bad kiwei de ki MDC ka JHADC, u Dolloi ka Elaka Jowai, Dolloi Puramon Kynjin,ma Justine Dkhar Ex-MLA, ma Nehlang Lyngdoh Ex-MLA, u Deputy Commissioner ka East Jaintia Hills District u A. Baranwal, IAS, ma Kor Sympli Ex-MDC JHADC, kong Santa Mary Shylla bad kiwei de ki riewkhmat ka Raij Tuber bad kiwei de ki nongshah khot sngewbha kiba napoh ka Raij bad nabar.
Ha kane ka sngi la ioh ruh ia ka jingkren kyrkhu kyrdoh ia ki khun ka Seiñ Raij Tuber da u ma Kyrmen Shylla uba dei ruh u MLA ka thain bad na u bah Remington L Tongkhar. La nangpynphuh pynphieng ia ka Madan shad behdeinkhlam Biar Blai da ka jingieng jong ki 60 tylli ki Rot rong kiba ka ohdur ha ki dur kiba pher bapher bad napdeng kine la don ruh ka Rot rong kaba la buh da ka dur jong u Vidalamir Putin bad ki Missile kiba hiar thma ia ka Ukraine.
Ka jinglehniam Beh deinkhlam ka long kaba bha kaba miat kaba iaid beit iaid ryntih ha baroh ki jinglehniam bad ka jingnoh ia ki Rot rong ka long kaba jop kaba shit kaba rang kaba pynsuk ia ki nongwan sakhi ia kane ka sngi pynkut ia ka Behdeiñklam jong ka Raij Tuber.
Ha kane ka sngi wat lada u Conrad Kongal Sangma Myntri Rangbah duh ka Jylla Meghalaya um lah ban ia don lang, hynrei na ka liang jong ka Raij Tuber ka la ai ia ka Memorandum ha kaba la kypad ia u Sangma ban thaw ki lad ki lynti ha ka ban shna ia ka Public Viewing Gallery, ia ka Museum bad ia ka Cultural Centre bad na ka bynta ban pynbha pynmiat shuh shuh ia ka Biar Blai bad ia kiwei de ki jingdonkam ba kyrkieh jong ka Sein Raij Tuber. Ha kane ka sngi la pyniaid ia ki programme jong ka Behdeiñkhlam da u ma Bewill Shylla President ba mynshwa jong ka Seiñ Raij Tuber.
