Kumba ju long shisien shisnem ka Proseshon Iukharist ka Parish Iingmane-bah Laitumkhrah Shillong, hynne ka sngi 09/11/2025 la pynlong ia kane ka Proseshon bah kaba shisien shisnem ha Madan Calbary, ha kaba da ki phewhajar ngut ki paidriewngeit ka Archdiocese Shillong kiba kynthup na ka Diocese Jowai, Nongstoin,Tura bad na kiwei de ki jyllaniam ba marjan ka jong ka Archdiocese Guahati kila ia wan iashim bynta.
Ha ka por shiphew baje mynstep (10.00 AM) la pynlong ia ka jingkñia Mass Iukharist kaba la lamkhmat da u Auxiliary Bishop Most. Rev. Bernard Laloo DD ha ka jingiadonlang u Archbishop Most. Rev. Victor Lyngdoh DD bad synran lang da ki spah ngut ki Lyngdohsohblei bad katto katne ngut ki Lyngdohsohsla (Deacon) kiba la pynkhreh ialade ban poi sha ka thong ka jinglong Lyngdohsohblei.
U Bishop Bernard Laloo haba sam ia ka ktien ka jong U Blei bad ha ka sneng ka kraw ia ki paidriewngeit, u la pynkynmaw ia ki paidriewngeit ban im sngi ia ka Ktien ka jong U Blei bad ia ka Mynsiem Mishoneri (Missionary) ban iasam ia ka ktien ka jong U Blei sha kiwei pat ki bym pat da tipshai shaphang U Jisu Khrist Uba long U Blei bad u Nongpynim jong ka pyrthei khamtam ha kaba kum kane ka snem ka jingpynkhreh ia ka Jubili bakhraw jong ka snem 2025.
Nangta u Bishop Bernard u ong ka snem jingpynkhreh ia ka Jubili bakhraw u dei u snem jong ka jingkyrmen bad ka Balang ka kyrmen skhem ba ki khun Khristan jong ka Balang kin imbha im-miat shwa ialade bad ba kin shim khia ia ka kam Mishonery ban pynphriang katba lah ei ia ka ktien ka jong U Blei sha kito ki bym pat da sngewthuh shai bha shaphang ka Khubor babha jong U Jisu Khrist.
Hadien ka jingknia Mass Iukharist bakhuid, u Archbishop ka Archdiocese Shillong, u Most Rev. Victor Lyngdoh, u la pyllait paidbah ruh ia ka Shithi sharai Balang jong u sha ki paidriewngeit bad ha ka nohphaisngi la pynlong ia ka Proseshon Iukharist ka baphuh ka baphieng kaba shongkun shongblei ha kaba da ki phewhajar ngut ki paidriewngeit ki la iashim bynta ha ka jingiaid proseshon ha ryngkat ka jingduwai bad ki jingruwai iaroh ia U Blei ha shilynter lynti jong ka proseshon kaba la sdang na Laitumkhrah-Dhanketi-St Edmund-Fire Bridgate-Laitumkhrah Police Point bad wan pynkut ha madan Calbary. La pynkut ia kane ka sngi da ka jingkyrkhu ba kyrpang ia ki paidbah da ka Sakrament bakhuid tam ka Duwan.
